馬逢國帶GEL上機 GASTBY出細支裝抽水

立法會議員馬逢國被指日前在機場離港時懷疑「撻朵」，違反不准帶100毫升以上髮型定型啫喱上機規定，涉事職員就俾機場保安公司紀律調查。事件繼續成為城中話題，定型啫喱膏品牌GASTBY更推出細支裝的啫喱「抽水」，諷刺馬逢國終於可以帶符合規定的啫喱上機。

GATSBY在facebook出發文：「呢去旅行都想帶支定型啫喱膏gel番個靚頭，但擔心帶住太大支gel唔方便？唔洗怕！依家買GATSBY定型啫喱膏(特硬/濕硬)，會附送一支30g輕便裝，細細支咁方便，想帶去邊都得啦！(數量有限，售完即止)」

GATSBY更以「#定型啫喱膏」、「#30g可以帶上飛機」、「#時刻保持靚仔造型」作HASHTAG。

香港空勤人員總工會就發表聲明，形容馬逢國的事件嚴重程度相當於2016年涉及時任特首梁振英「行李門事件」，再次突顯權貴利用個人公權力挑戰機場保安人員的專業。工會重申有關規定是因應國際恐怖主義肆虐而採取的安檢措施，目的是保障乘客及航空人員的人身安全。