
踏入暑假,又係動畫嘅天下!Pixar動畫《超人特工隊2》(Incredibles 2)上周四於香港上映,只係上畫一個星期,已收逾3511萬港元票房,更加破埋同《超人特工隊》嘅總票房(3379萬)呀!
事隔14年出續集 成美國史上最賣座動畫
其實《超人特工隊2》上月於北美開畫,已經大受歡迎!累積票房已達5.6億美元(約43.7億港元),更超越同為第二集動畫嘅《海底奇兵2》(Finding Dory),登上「美國史上最賣座動畫」之位。
而電影於香港上畫,首日開畫票房已高達481萬,仲破埋Pixar動畫開畫周末票房紀錄;比《反斗奇兵3》(Toy Story3)、《怪獸大學》(Monsters University)等動畫系列更收得!其實《超人特工隊》首集早於14年前上映,等咗咁多年先有續集,又難怪觀眾反應咁熱烈嘅。
