【冇斷交!】張敬軒親自請Boy’z做嘉賓 同Kenny一直好好朋友

圖︰張敬軒演唱會請來關智斌有份嘅Boy’z做嘉賓,仲大方回應二人「斷交」嘅傳聞。(ig圖片)

張敬軒(軒仔)一連6場嘅紅館演唱會昨日(19日)尾場,日前因請來Boy’z做嘉賓,而引發全場Fans大起哄。軒仔特別喺尾場encore環節,臨時請觀眾席上嘅Boy’z再度上台合唱!

軒仔更加喺演唱會後大方回應同關智斌(Kenny)嘅「斷交論」,仲話同Kenny一直係好好嘅朋友,平日封口避談對方係另有原因……

主動扶Kenny上台 Steven即時嗌走!

軒仔喺台上笑言︰「前晚(17日)關智斌做嘉賓,我見到神蹟,我睇到傷殘座位嘅觀眾全部企晒起身,感謝主!我未見過紅館核爆,不如今晚再爆多次,徇眾要求,好多其他場次嘅觀眾都留言要求還Boy’z畀佢哋!」

請二人上台時,軒仔仲主動伸手扶Kenny上台,Boy’z嘅另一成員張致恒(Steven)則要自己跳上台,搞到Steven一上台即時嗌走!軒仔都好識做,即刻上前拉實對方話:「你好重要,無你點成…..Boy’z呢?」之後三人合唱《死性不改》,唱到獨白時更改對白,大放笑彈!Boy’z落台後,歌迷不斷叫encore,軒仔就話要留返Boy’z開演唱會時先再聚。

封口係唔想影響二人工作

演唱會後,軒仔回應傳媒有關佢同Kenny斷交嘅傳閒,軒仔直認︰「其實一直以嚟我哋都冇減少來往,只不過係有時啲報導,唔想講太多,費事答咗之後越描越愈。」

佢仲話︰「我哋咁多年都係好好、好好嘅朋友囉,係好Close嘅朋友,關智斌唔需要因為張敬軒而見報,同樣張敬軒亦都唔需要因關智斌而見報,呢個都係封口唔講(對方)嘅原因。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟