唔好睇林子善喺鏡頭前唔正經、好搞笑咁，其實佢都係「愛妻號」嚟㗎！不過，近日爆出一批「情慾短訊」，揭發林子善喺同老婆Kary婚前一度分手嘅「真空期」入面，同一位L小姐拍拖、同居，知情者疑因林子善喺婚禮上「扮專一」而睇唔過眼，仲公開林子善向L小姐發出嘅露骨「情慾短訊」內容！
對於婚前拍拖同「情慾短訊」被曝光，林子善凌晨於facebook以帖文及短片回應事件，指「多謝大家關心！唔洗膽(擔)心我同太太，睇完新聞後我同佢都笑左(咗)出嚟！」又話自己衰，成日講笑，「放心冇影響我兩個嘅心情，但亂UP(噏)係我個性真係好難改」，指事件唔會影響佢同老婆Kary嘅關係。
L小姐都係圈內人 林子善唔肯開名
今年大約3月，林子善同Kary結婚在即，L小姐亦曾透過facebook將「情慾對話」傳俾Kary！好彩林子善有同Kary「打定底」，一早已經將同L小姐一齊發生過嘅事話晒俾Kary知，所以Kary收到對話時都唔太驚訝。
林子善又澄清，當年並非因為鍾意L小姐而同Kary提出分手；而係同Kary分手後在「真空期」識到L小姐！不過，林子善就封口唔肯講L小姐係邊個，只係透露對方係圏內人，唔想因為事件影響佢工作。
對於「情慾短訊」中，林子善向L小姐講咗以下一段「咁爆」嘅言論︰「黃秋生話齋，你咪睇我神神秘秘，以為我喺度推銷，其實我攞咗啲預防愛滋病嘅避孕套。」仲話：「我咪喺度聞緊妳殘餘嘅氣味，喺張床度！」林子善解釋，避孕套係佢當時去日本玩，見到啲好得意嘅套，先講笑話買返嚟；又話仲有一啲對話，唔知對方有冇加多減少！佢仲話自己成日「亂噏」，老婆Kary知道都唔會嬲！
同老婆Kary復合 全靠唐詩詠勸告
至於同老婆Kary可以成功復合，好朋友唐詩詠都有好大功勞！話說唐詩詠知道林子善同Kary婚前分手，就勸林子善要好好珍惜Kary，所以拍拖一個月，林子善就突然「浪子回頭」同L小姐分手。
林子善同L小姐分手時話︰「我諗我哋真係要諗清楚，大家係咪適合大家。問題唔係喺你身上，又或者你太強而令我有壓力。」林子善接受訪問時都話：「(同L小姐分手)最致命原因係我好掛住我老婆，亦覺得同對方唔適合，所以決定分開。」
希望林子善婚後乖乖錫老婆﹐唔好再傳出負面新聞令Kary傷心、朋友擔心！
