Sica發長文感謝梁祖堯:無條件咁為我哋付出

ViuTV《全民造星IV》30強名單誕生,賽果有人歡迎有人愁,梁祖堯任導師的B組,因以2:3落敗,需再淘汰5名組員,最終曾在演出跌倒但醒目執生獲讚的Sica(何洛瑤)不幸被淘汰,反而失準的方方(方芷欣)成功留低,令不少網民為他剛到不值,並批評梁祖堯選擇組員的準則。

Sica在IG上分享了當晚比賽所穿的戰衣,以長文剖白參賽感受,並為梁祖堯辯護,大讚他是好導師。Sica表示:「呢件衫我喺上面寫曬每一個喺b組台前幕後所有人嘅名㗎,因為我真係好愛大家,所以好開心最後一個item係帶住大家一齊上台!不過我要提前一步走先啦,好感恩我有幸學到咁多野,比我想像中行得更加遠,收穫到嘅俾想像中嘅多更加多,好想好好多謝你哋每一個。」

Sica續指:「呀祖我好想多謝你,你真係一個好有心嘅導師,一個心地好好嘅人。節目剪出嚟嘅時間同內容有限,但你為我哋付出嘅時間同心機遠超於大家嘅想像。你幾乎每一晚都陪我哋留到好夜,幫我哋安排好多好有意義嘅exercise,每一輪都逐個女仔比一個方向我哋去成長突破,又會介紹老師比我地,又會請我哋食飯又或者煮飯鼓勵我哋,又會好仔細幫我哋執好多燈光畫面嘢,又會幫我哋買表演用具/服裝,喺我哋好好冇自信嘅時候你會鼓勵我哋好多,其實真係數都數唔曬你付出過嘅嘢,好多位都真係好無條件咁為我哋付出。喺你身上我學識咗點樣攞個心出嚟表演,我開始識得對人打開自己,我開始學習去相信自己,而呢一切比起我學到嘅技巧更加寶貴。好多謝你呀祖,好慶幸我做演藝呢條路上面嘅起點係喺你個studio(當然我都好希望可以繼續行到落去!)我真係好好彩可以入到嚟b組!!我好愛你呀!」

Sica又指:「仲有喺呢兩個月日日跟住我哋嘅製作組,雖然你哋部份時間都mean緊我地,我又間唔事漏吓嘢、自卑吓、懷疑吓自己激到你哋扎扎跳,但我知道你哋好愛我先咁講係咪先係咪先係咪先,反正冇得答唔係🤍好怕好似好門面說話,但除咗辛苦曬我唔知可以講啲咩去多謝你哋呢段時間嘅付出,呢段時間日日出完外景又要翻返去剪片剪到好夜瞓咗一陣都冇又要晨早流流出返外景,我又有時約咗啲地獄死亡call time搞到你哋咁早起身,你哋真係好癲,極度respect的。真係要比好多掌聲你地!」

Sica提到:「其實呢個節目點都會有完嘅一日,我只係早少少離開呢個舞台。咁講好似好自戀,但我知道可能大家會唔捨得我,我都好開心原來自己係有人支持,不過可以表達自己諗法的話希望大家都唔好唔開心咁耐,可以開開心心一齊送走我,好希望我重視嘅人冇一個會俾人攻擊,佢地從來都冇欠過我任何野,相反俾咗好多嘢我,比我想像中多太多。同埋我真係有不足嘅地方㗎!始終十個名額真係好有限,其他入咗去嘅人都好好,佢哋都好值得繼續行落去㗎,加上嗰陣時都冇灰心太耐,好快振作返了!大家都唔好太擔心我,總之應承大家我一定唔會放棄,我相信喺呢個舞台以外一定會有機會再見!笑返啦所以!

Sica最後表示:「但願呢段時間我有曾經為大家帶來過少少歡樂、少少淚水、少少激動。但願大家好耐之後提返起呢個節目,會記得曾經有我呢個人嘅存在。咁我就心滿意足了。」

何洛瑤IG圖
何洛瑤IG圖
何洛瑤IG圖
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟