林景程演活地產經紀成功彈起 網民:幾乎係地產中介代言人

由游嘉欣、林正峰擔正、並起用大量新一代演員的《青年心城》,首集播出後反應理想,除了焦點落在近期上位的21歲無綫小花嘉欣BB,另一位成功彈出的,是演活「攣都拗番直、死都拗番生」地產經紀的林景程(King)。劇中為了氹掂林正峰飾演的阿峰,King將每個單位都包裝得相當完美,金句盡出,網民笑言聽佢講完後,「垃圾房都變豪宅」。

由於之前King在《香港愛情故事》同樣飾演地產經紀,更因而獲得拍廣告機會,獲網民封為「無綫專業地產經紀」,網民更力讚他演技好:「林景程專做地產,好似以前顏國樑(經典角色陳積)專做Sales」、「成集最深刻都係林景程」、「佢好搞笑!仲話兇宅業主好人」、「佢幾乎係地產中介代言人」、「夠晒咬牙切齒」、「好認真落力Sell」。如果夠細心,不難發現劇集中出現的地產宣傳廣告相當盞鬼,包括:「唐三藏師弟‧輕鬆做唐四」、「纏綿遊戲‧大床小房」、「收兵好過嫁人‧收租好過打劫」等。

由於King除了是演員,亦是專業治療師,故有網民笑言著他轉行:「喺香港做地產好過做物理治療師啦」,但亦有人認為:「物理治療師係專業人士,都仲好搶手」。對於備受網民關注,只是第三次飾演地產經紀的King笑謂:「其實我完全唔識地產知識架。(有冇畀人誤會過係真Agent?)有呀,啲人成日以為我有兩個牌,就係物理治療師同埋地產經紀,有時有人睇中啲樓盤又會掟畀我問我意見。另外有地產界嘅朋友,又會叫我幫手向我身邊人推介樓盤。」

有九年演戲經驗的King,之前演出《七公主》亦有備受關注,並為劇集擔任物理治療顧問;而他在下周一(18號)推出的台慶劇《星空下的仁醫》,亦會飾演小兒外科醫生;另外現時還忙於拍攝《四十二章經》、《法證5》及《隱形戰隊》的他,被問到物理治療及演戲兩邊走如何分配時間時,King笑指:「時間分配係有啲難,因為拍劇有時要踩到凌晨,但物理治療通常要返早,以我咁大年紀咁樣係有啲難頂。近排因為拍《四十二章經》都咁樣頂咗一個星期,真心頂唔順,好彩公司都好就我,畀我調配時間返晏啲,追夢係要付出成本架啦。」

另一位贏得討論點的演員是林正峰,繼《愛情故事》後「冧莊」演廢青的他,不單演技、就連顏值亦成為討論點,有人認為他未夠靚仔擔正男一,但亦有人認為:「唔通搵靚仔演廢青咩」、「廢青嚟講算有顏值喇」、「呢個峰哥,做戲都幾自然,幾貼地」、「演廢青入型入格」。雖然有人指「峰哥」角色頹得過份,但亦有人認為一點也不誇張,並謂:「其實香港真係好多呢啲人」。

對於兩位新一代主角演技,網民有讚有彈,但總括認為應多給予機會年青演員:「同意男女主角要浸,但睇青春劇都預咗,係睇感覺,睇完第一集Ok啦!」另亦有唔少網民讚劇情貼地,更有人認為五集唔夠喉:「感染下青春氣息幾好」、「第一集唔拖,幾好,希望Keep到。」、「以小小誇張手法,帶出貼地題材,感覺冇咁悶,比《香港愛情故事》有驚喜,會追。」、「五集?太短喇」、「會否拍多幾輯,由不同人拍,不同人做主角。」

林景程演活地產經紀成功彈起。
林景程演活地產經紀成功彈起。
林景程演活地產經紀成功彈起。
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟