【最難行的路】鄭欣宜巨型紗網裙拍MV 寸步難行

鄭欣宜(Joyce)繼《@princejoyce》、《先哭為敬》、《罰你》之後,推出第四首派台作《最難行的路》,她認為每個人的人生路各有不同,即使再難行,也不要太聚焦難行的部份,而今次Joyce拍攝MV,便親身體會到何謂「最難行的路」,因為形象指導為她安排了一條重量十足、令Joyce寸步難行的巨型藍色紗網裙。

鄭欣宜身穿網紗裙拍攝新歌MV,寸步難行。

今次MV中,Joyce會以三個不同造型出現,形象指導更在韓國空運了一條巨型紗網裙來港,配合現場的歐洲式建築,還有Joyce臉上的閃石妝,充分展現了她高貴而夢幻的一面。Joyce 表示因為條裙好重又好大條,要五個工作人員合力先可以搬得起,好在拍攝的時候樣樣都好順利。

由於巨型藍色紗網裙「重量十足」,期間導演要求Joyce「試吓行前兩步」,但最終失敗,完全體驗到何謂「最難行的路」:「雖然我唔特別覺得自己條路難行,我反而好相信每一個階段、每一段路都有佢嘅原因,先可以帶到我嚟到今日嘅呢一個地方。」

巨型紗網裙令欣宜充分展現高貴而夢幻的一面。

接着Joyce換上火紅色晚裝,被多位舞蹈員指罵,當中一位高人一等的型男,其實是新加盟寰亞大家庭的蔡浩然(Scott),當日前來客串Joyce MV的他,原來是第一次拍MV,Scott說:「好開心入咗寰亞之後多咗機會去試新嘢,早排第一次拍電影,今日第一次拍MV,仲要係幫欣宜拍,自己跳開舞,MV又有跳舞嘅元素,希望可以展示自己擅長嘅地方,等大家了解我多啲。」

欣宜換上火紅色晚裝拍攝MV。

至於另一個造型以黑、白色為主,Joyce更戴上百萬珠寶進行拍攝,她搞笑說:「Oh my god,造型師冇同我講要戴咁貴嘅珠寶,但今次MV三個造型我係未試過,所以我覺得好amazing。」

除了造型上的驚喜,收到Wyman所填的《最難行的路》歌詞時,同樣給Joyce既驚喜又感動:「之前睇過Wyman一個社交網站嘅post,係佢以前幫其他歌手寫過嘅歌詞,嗰時電腦未普及,每一份歌詞都係用人手寫,當時我同過佢講『我又要』,但無奈我第一次同Wyman合作係2015年嘅《你瘦夠了嗎?》,一切已經電腦化,但今次我收到呢一份《最難行的路》歌詞嘅時候,係我一擘大眼、一打開個電話,就見到佢嘅手寫稿歌詞,我真係好感動,Wyman都有透露佢寫呢份詞嘅時候,自己忍唔住喊,好多謝佢!」

欣宜戴上百萬珠寶進行拍攝。

其實早在去年,Joyce已收到《最難行的路》的曲,直到今年才推出,Joyce解釋:「呢首歌係徐沛昕作曲,舊年收到首歌嘅時候,一聽就覺得好搶耳、好快識得跟住唱,所以hold起咗,而家加埋Wyman嘅詞,諗住做年尾嘅一個major plug。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟