《試當真》阿慈為新歌獻出MV處女作 稱想拍親熱戲嚇林奕匡一跳

林奕匡(Phil)近日推出新歌《關於愛的碎念》,以哲學角度探討情愛問題。新歌MV邀得人氣網絡頻道「試當真」大熱女主持的阿慈擔任女主角,原來今次是阿慈是首次參演拍MV,令Phil感到有點驚訝:「佢拍嘢拍得多,一睇佢就有種professional嘅感覺。」獲讚的阿慈立即「回敬」,表示都愛聽Phil的名作〈高山低谷〉及〈安徒生的錯〉,他們對對方的第一印象都不俗,成為拍MV的好開始。

對於今次合作,Phil笑言已經很久未試過MV中有女主角:「我覺得MV中有女仔的話,會吸引到多啲男仔睇多啲!」整個MV帶moody感覺,Phil直言亦作了不少新嘗試;愛開玩笑的阿慈坦言最期待拍親熱戲,讓Phil嚇了一跳!阿慈急急解釋:「因為成個MV好artistic、好moody,我期待啲情感爆發嘅戲……」令Phil笑不停。

《關於愛的碎念》MV以白色為主調,一身白色造型配以漂白髮色上陣的Phil坐在半透明的房間內,隔著小屏風聽阿慈訴苦,被問到現實生活中,他們會是聆聽者,抑或傾訴者?兩人異口同聲指是聆聽居多,但Phil提到如果自己有事要呻訴,反而會以文字宣洩:「可能係send封email,或者係一封簡短嘅信,去講一啲自己嘅心底話,因為當你寫嗰陣,可以小心地用啱字眼去表達你想講到個意思。我講嘢唔叻,所以如果我要錄低,可能要錄好多次,用文字可能會容易啲去表達。另一個用寫好過用講嘅好處係,無論你想寫俾自己定人哋,甚至鬧人都好,有時你寫完之後,你可能已經覺得嗰條氣順咗,有幾次喺facebook或者唔同平台上寫咗一大堆字之後,『呼,算喇!』就click out、refresh或delete咗佢,因為條氣順咗啦嘛。」如果現實中要向樹洞訴心聲,Phil透露會將對象設定為已離世的家人或朋友:「我覺得要講俾仲喺度嘅人聽嘅話,就不如直接向嗰個人講啦,想講但又唔敢講,唔好婆媽,要講就去講。」

歌詞中另一著眼點,就是「好勝」,Phil坦言以往是個好勝的人,就算玩遊戲都要跟足規矩,甚至試過鬧喊朋友,結果被老婆狠狠地教訓:「歌詞都有講好勝嘅問題,我哋明明想喺埋一齊,我哋都respect對方、鍾意對方,但係因為我唔想落唔到台,覺得要面子的話,反而係害咗大家。」

今次的新歌原來在正式面世前,已有樂迷有幸率先欣賞!就是在今年7月去看過Phil個人音樂會的觀眾,Phil一臉滿足地說:「其實呢隻歌好得意嘅,無論寫嘅時候或唱嘅時候,整個過程有好多關都要諗好耐,因為呢隻歌我好鍾意,我覺得好重要,所以當做每一件事都想再好啲。最深刻可能係演唱會第一次唱,嗰時係新到連歌名都未有,歌詞都未finalize,但好想同大家唱,所以我記得嗰一刻,係好special嘅!」而阿慈則成為首個非唱片公司人員聽到這最終版本的聽眾,她興奮地表示:「我事前不停loop首歌,細味歌詞,好洗腦,而家調轉都識背!聽完之後亦有嘗試沉澱下啲情緒,諗返啲回憶,希望可以幫到入戲。」她又指因為這是自己首個演出的MV,所以刻意減肥和做運動,晚餐都以Phil的歌詞來「充饑」。

作為「首位」聽眾,阿慈聽歌後亦有所領悟:「我嘅結論係人最緊要就係溝通,否則就會後悔。因為成首歌好似帶住一個好遺憾嘅氛圍,有少少sad嘅,覺得『如果當初我有講呢句,件事會唔會好啲呢咁樣?』」Phil便解說指,其實最重要是取得平衡,假設自己的另一半做了錯的事,而自己每每都針對對方的話,兩人相處會變難;但如果不向對方提出問題點,又可能會因為一個不知錯而繼續做,令磨擦變多,就更難去修補,所以一定要取得平衡。Phil明言:「我想寫呢隻歌時,想提到無論愛情、親情、友情,一定有好多conflict、大家意見唔同嘅時候,究竟有幾重要,要令到對方去認同你呢?而喺咩情況下,就算你明知可能你啱啲嘅,但你著重呢個關係而肯讓步令到對方舒服啲,又或者係令到件事和諧啲呢?有好多人做唔到呢樣嘢,兩個人都做唔到時,就會散㗎喇,總要係有個人讓步。」

講到自己的「讓步」底線,Phil指其實有很多不同程度的讓步空間,視乎事件本身,如果對象是自己的另一半的話,「就算佢做錯咩都好,大家都繼續一齊行落去㗎嘛?所以去呵返佢或𠱁佢,至少要做啲嘢,俾佢知道大家係要一齊行落去嘅。」但他也不諱言,面對很明顯的是非黑白,就算是一位相識多年的朋友,Phil仍認為要明確表態:「有啲人可能覺得我哋都認識咁多年啦,係一定要珍惜嘅,但係人係會變,但係喺埋一齊、相處嘅時候都係唔開心,而佢真係唔珍惜你、當係一個朋友,咁何來你咁著緊去傷害自己去珍惜佢呢?因為有時朋友真係唔需要多,但係一定要係好。」

阿慈為林奕匡新歌獻出MV處女作。
阿慈為林奕匡新歌獻出MV處女作。
阿慈為林奕匡新歌獻出MV處女作。
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟