【盛‧舞者】袁鎮業首輪陷淘汰邊緣 談九年演藝辛酸路落下男兒淚  

一連11集、集合全港熱愛跳舞精英的無綫全新「舞動」綜藝真人Show《盛‧舞者》,昨晚(7月7日)10:30翡翠台播出第三集。延續上一集的「一人一個故事」,本集以「機會」為題,將故事聚焦在曾參演《愛‧回家之開心速遞》的袁鎮業(Kelvin)身上,立了很多決心重拾舞蹈的他,險陷首輪被淘汰困局!

今集緊接上集繼續講述三位導師狄易達、麥秋成及王君馨如何在一眾舞者中,挑選屬於自己戰隊的精英。三人輪流作了專業示範後,參賽者便在指定時間內持續努力認真地練習舞步,其中備受矚目的火雞姐(丁可欣Yanki)受訪時直指過程好好玩:「最攰係達仔嗰隻,練完兩隻舞仲要落地仲要前滾翻,滾嚟滾去我都唔知自己滾咗去邊,然後Bomb一聲就完咗。」至於導師,則趁參賽者練舞空檔,與錢嘉樂等開心分享心目中盛舞者應具備的條件,眾人七嘴八舌謂:「要表情管理啦、速度啦、要型!唔可以只係自己跳得好,Freestyle要有個性,但團體時又要有Team Spirit。」 其中秋成更讚嘆謂:「神奇地見好多女仔參賽選手嘅前滾翻都做得幾好。」足見一眾舞者實力。為了炒氣氛,孖8、Eden、Monkey J.、俊堅等更在司儀要求下,於甄選前「最後衝刺」晒舞技吸引導師青睞。

之後三名導師便開始揀選心頭好,三人分七輪在手持的黑板寫上心儀舞者編號,如出現「爭人」情況,便由舞者奪回主導權挑選心儀導師。君馨與達仔爭火雞姐期間,君馨竟大爆火雞姐是達仔徒弟,更搞笑謂:「你同佢跳咗十幾年 可以轉吓人!」達仔則簡單地還擊謂:「我要你突破自己!」最終獲火雞姐「重返懷抱」。

全晚終極洋蔥位則落在Kelvin身上,身陷淘汰邊緣的他,談到因傷患等原因放棄當全職舞者時數度哽咽,並落下男兒淚:「今次呢個比賽好掙扎,因為我真係停咗好耐冇郁。我係好鍾意跳舞,我做全職,但不幸勞損咗,所以我發展咗新道路。我發展咗九年、付出咗九年,頭幾年我好努力操好弗好乾身,但都係冇機會…隨住年紀開始大,我想Pick Up番跳舞,身體暫時都仲未可以同步,但我已經盡咗最大努力。」錢嘉樂聞言即感性謂:「年青就係咁好,有咩心事都可以真情流露,到我呢個年紀會收埋好多嘢架。」幸好達仔最終選了Kelvin作最後一位戰隊成員;對於Kelvin得償所願,現場舞者大表振奮,紛紛擁著他道賀及安慰,場面感人。

事後Kelvin接受電話訪問時,坦言九年的演藝路雖然比別人行得慢,也曾錯失一些機會,但他卻依然沒有失望,因為他覺得反而讓自己多了時間去修煉演技、累積經驗、汲取足夠知識去裝備自己,以最佳狀態抓緊機會。他又指入行初期曾對擔任替身感到反感:「我轉幕前就係想企前啲,想多啲人望到自己。但當我做替身,我係唔需要講對白,只係影我膊頭、背影咁,我會有啲唔開心,因為唔係我鍾意做嘅嘢。」不過他透露最近依然接了一個替身工作,不過卻大感雀躍,因為感到備受尊重及有很多學習機會,足見其單純。

問到Kelvin藝人與舞者何者較艱難,他坦言做藝人更複雜,更需要靠自己努力;談到經濟狀況,他坦言當全職舞者時收入穩定,反而當了藝人後有時會入不敷支,不但要靠儲蓄,更試過有段日子「冇畀家用」,幸而得家人支持及體諒:「佢哋都好明白同支持,家人真係好好」 而明晚第四集《盛‧舞者》將移師巨型躉船,展開首場團體賽,經過齊舞及Battle兩個回合比併後,將再有舞者被淘汰,十分緊張刺激。

TVB供圖
TVB供圖
TVB供圖
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟