黃妍宣布7月推新專輯8月開音樂會   個唱海報以鮮色爆短裙性感上陣

O. U. R. Works(平原習作)O.U.R. works(平原習作)唱作女歌手黃妍(Cath)早前推出新歌〈無聲浪〉,以記錄她外婆因患上腦退化致記憶錯亂,令兩婆孫像活在不同的時空中,沒法對上頻率,乖孫 Cath 決定趁還有機會,把心情以曲及詞記下自己的感受。而由〈無聲浪〉延伸出來的影像與聲音體驗展覽《The Reverberation Of Us 我們的迴響》於上月底假中環PMQ元創方舉行。轉眼間,為期四星期的展覽昨日來到尾聲,Cath 與聯手創作此展覽的香港電子音樂人、獲提名今屆(第 32 屆)金曲獎演奏類最佳專輯製作人獎的 hirsk,以及當代多媒體藝術家 – 劉君冬(Dorothy Lau)(視覺創作)一起出席閉幕禮。

活動由 hirsk 演出《Concrete Jungle 混凝森林》揭開序幕,hirsk 透露特地挑選這首曲演出,以配合展覽主題,他說:「呢個展主要係講人與人之間嘅關係,我頭先隻《混凝森林》其實係講緊同個城市之間嘅關係,換句話講,其實係reverberation of the city城市的迴響。」接着到 Cath 現身,她透露在展期中,只要不用開工便會到場,客串做導賞員,但卻誤變「趕客」導賞員,她笑說:「見到啲人喺門口裝吓裝吓,我去同佢哋打招呼say Hello,跟住對方就掉頭走,搞到啲 helpers 都叫我等人哋入咗嚟先好行埋去。其實係好感動嘅,因為好多朋友睇完個展覽、聽完歌之後會喊,我負責遞紙巾俾佢哋,另外有啲會同我分享返佢同佢長輩之間嘅故事;亦有人睇完之後會get到個message,覺得真係要珍惜身邊嘅人,令我好感動。」

Cath 的出現當然不單止到場向支持者致謝,她在樂手們的現場伴奏下,獨唱展覽主題作〈無聲浪〉,及與 hirsk 合作演唱〈我心中尚未崩壞的部分〉及近日才在展覽中「曝光」的全新作品〈輕盈〉。而 Cath × hirsk 版本的〈輕盈〉更為今日限定!故到場的樂迷可謂大飽耳福。Cath 又溫馨提醒歌迷:「之前已經有人喺展覽聽到少少,好多人嚟問我係咩歌,而家大家都有得聽啦!〈輕盈〉會喺 28 號(今日)正式上架,大家記得去聽。」到場捧場的粉絲立即報以興奮的歡呼聲和應。

提到展覽共吸引超過2,000人次到場參觀,Cath 坦言感到十分意外:「開頭我同成個團隊對於入場人次係無乜信心,諗住一日頂多咪30、40人,但係我哋高峰期差唔多一日去到300人次,成個月有超過2,000人次嚟,我哋都好驚訝!真係好多謝大家支持,真係好感動。有啲人話音樂好聽,甚至有音樂人嚟,好似Cousin Fung之前嚟,佢逐個聽,聽得好detail,仲會俾返comment我,真係好感動。香港嘅節奏好快,大家邊有時間去靜止、去聆聽自己、聆聽世界去感受呢?所以俾到呢個空間大家,我覺得好好,而自己亦都好似多一個可以hea嘅地方,我又可以同人直接溝通,所以真係好唔捨得佢完。」

Cath 在昨日的活動中,除了帶來新歌、並作一日限定的演出外,另帶來兩個驚喜的消息!首先是她的新專輯將於下月 16 日推出,碟中將收錄 9 首歌。另一好消息是 Cath 將在今年 8 月 27 日舉行個人音樂會,《FTLife富通保險呈獻:「黃妍 Cath Wong 2021 音樂會」》而演唱會海報及詳情亦在今日曝光!平日走文青路線的 Cath 今次大玩新形象,換上螢光綠色加上超短裙的她,晒腿上陣,她笑言身邊的親友看到她的照片後,都不禁發出「Wow!!」的譁然聲。不過,Cath 笑言那不是一副性感照,反而是一個「腰痛樣但要扮唔痛嘅高級樣」。

Cath 笑言:「大家『Wow!!』嗰個位係成個造型都好革新,好鮮色,我未試過着螢光綠色嘅衫,而且條裙超級極度爆短!咁啱因為影海報嘅時候,我因為拖地搞到扭親條腰,我已經郁唔到,加埋要着對鬼死咁高嘅高踭鞋,對鞋又要攝住喺我膝頭哥個位,所以無論我做任何動作,就算我行路都好似好輪盡,好似個機械人咁,條腰郁唔到,後來發現自己好似上半身郁唔到咁樣,最後喺攝影師提議下試做啲唔同動作,就變咗而家見到嘅效果,唔使郁到條腰吖嘛!所以嗰個係一個腰痛樣但要扮唔痛嘅高級樣,哈哈!」Cath 突然來個大變身,令身邊的人都譁譁聲,她透露自己對新造型完全沒有抗拒:「其實喺過去一年做呢張專輯嘅過程中,都不斷去挑戰自己嘅極限,包括以前未試過嘅曲風會去試,今次造型都一樣,可能以前嘅我會質疑自己着唔着到,今次試完之後,發現效果都好靚,睇落去都舒服,未來都減少俾自己嘅框框。」

《FTLife富通保險呈獻:黃妍 Cath Wong 2021 音樂會》
日期:2021年 8月 27日(星期五)
時間:晚上8時
地點:海洋公園怡慶坊
票價:$480 / $380
購票熱線:2111 5333
網上購票:www.cityline.com
門票於7月12日(星期一)早上10時起於 Cityline 公開發售

黃妍宣布7月推新專輯8月開音樂會。
黃妍宣布7月推新專輯8月開音樂會。
黃妍宣布7月推新專輯8月開音樂會。
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟