【拆彈專家2】劉青雲牛一收「彈」糕 難忘生日殯儀館取景

劉青雲今日57歲生日,他拍攝新片時,獲一眾台前幕後送生日「彈」糕。他坦言並非首次於片場慶生,最難忘於殯儀館渡過生日。

劉青雲獲贈「炸彈」蛋糕。

首度加盟《拆彈專家2》的劉青雲,兩年前拍攝該片時亦是適逢其生日,一眾「拆彈隊員」與導演邱禮濤及幕後工作人員齊齊送驚喜,為青雲在片場慶祝牛一,而劇組人員更專誠訂造一個別具心思的炸彈型蛋糕,逗得青雲笑不攏嘴,邱禮濤還笑指該「炸彈」屬於辛亥革命時的炸彈,令片場笑聲不絕。

邱禮濤(左三)與一班演員為劉青雲慶生。

向來敬業樂業的青雲,已非首次在片場度過生日,他說:「我哋呢一行,好多時都喺片場過生日,我成日都同人講,唔好話畀人知係我生日,不過今次就揚啲!最難忘一次試過生日喺殯儀館取景。」對於一眾「拆彈隊員」跟他慶祝生辰,青雲大表開心:「同佢哋唔只係首次合作,仲係首日開工,大家同一team人一齊拆彈,感覺好似戲裏劇情一樣,所以好開心。」

劉青雲即拆「彈」糕。

至於太太郭藹明會否跟他補祝生日?青雲即甜絲絲表示:「走唔甩,我相信一定仲有一個生日蛋糕。(太太為何不到片場送驚喜?)佢唔會嚟片場,佢知道嚟片場唔係太好,因為大家都做緊嘢,佢通常好少到片場探我班,因為佢知道我性格。」「愛妻號」的青雲更直言會叫太太不用送禮:「真係需要嘅嘢應該都有,未有嘅嘢都係冇咩需要,買咗放喺度唔用好浪費。」那麼青雲是否不喜歡收生日禮物?他解釋:「唔係唔鍾意,但唔需要破費,大家開開心心食飯咪得囉,其實送禮係一件好難嘅事,收咗人哋嘅生日禮物,人哋生日又要諗送咩畀人,都幾吃力。」提到生日願望,青雲坦言希望所有事順順利利,大家生活開心,好好過日子。

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟