梁雪瑤無悔棄建築設計闖娛圈:我真係熱愛演藝!

前亞姐冠軍梁雪瑤(Sheryl)讀建築設計出身,但她為圓歌手夢,竟放棄高薪厚職加入娛樂圈。不過她亦無悔,覺得能將自己的興趣變成職業感開心,還說:「我真係熱愛做演藝,所以唔覺得辛苦!」

梁雪瑤(蘇震揚攝)

梁雪瑤參選《2018年度亞洲小姐競選(香港賽區)》奪得冠軍後加入娛樂圈,雖然她曾參選港姐但未能入圍,不過所謂「邊度跌底,邊度起身」,她前年轉戰亞視即成功奪冠。Sheryl認為選美是其中一個快捷加入娛樂圈的途徑,但坦言未想過能奪冠:「可能參選港姐時經驗不足,所以吸收咗經驗後就參選亞姐,好開心好順利攞埋冠軍。我覺得港姐同亞姐都一樣矜貴,所以我唔覺得亞姐會畀港姐遜色。」

上填詞課程增值

經過一年多的時間,Sheryl今年以聖經金句,推出首支國語歌曲《二人總比一人好》,由自己親自填詞:「國語嘅感覺比較甜蜜啲,普通話所有華語市場都啱聽。(會考慮出廣東話版?)廣東話歌詞比難度比普通話高,但嚟緊都會試吓填廣東話歌詞,始終香港人嘅母語都係廣東話,大家嗰共鳴感會大啲。」她謂首次填詞有一定難度,但公司安排她上填詞課程,自己亦喜歡創作,所以感覺新鮮又「幾好玩」。身為基督徒的Sheryl,坦言不想被定型為福音歌手,想在創作上作多方面嘗試。

拍拖次數不多的Sheryl,表示歌詞或多或少都會包含自己的經歷。(蘇震揚攝)
返工如忘記夢想

讀建築設計的她至今仍無悔加入娛樂圈,Sheryl對放棄建築設計不感可惜:「我以前去建築公司返工,我覺得office嘅生活可能比較悶啲,每日都營營役役,好似忘記自己嘅夢想咁。我覺得將自己嘅興趣變成自己嘅職業,都好開心。」她又形容建築設計與做音樂創作都屬藝術性質,都是要找尋靈感:「因為係我自己好想做嘅嘢,係我自己理想,所以我覺得反而好開心。我真係熱愛做演藝,所以我唔覺得辛苦。」 她坦言自己有儲蓄同投資習慣,所以未感壓力亦不會太擔心。

梁雪瑤相信多人認識,工作幾會自然多。(蘇震揚攝)
對負評一笑置之

放棄穩定收入的設計工作去選美,又要一面對負面評論,Sheryl只能一笑置之:「可能話我嗰樣好普通,又話我有建築唔讀走去選美。我覺得冇可能取悅所有嘅人,只能慢慢改變佢哋嘅想法,用實力證明自己。」至於家人是否支持她的決定,她直言:「開頭都會擔心,因為佢哋覺得我嗰時都冇乜錢,都要用啲積蓄。我都相信只要喺呢行有成績,都唔擔心搵唔到錢,我自己都應付到。」Sheryl指家人看到她的負面新聞,會比她更不開心:「佢哋覺得點解咁話我個女,我個女都唔係咁。」她謂反而會安慰家人自己則會保持正面樂觀的心態。

梁雪瑤透露由從小便學習唱歌。(蘇震揚攝)

講到演藝目標方面,她謂想有更多人認識她,亦能於音樂上創作更多作品。除了歌唱方面,Sheryl亦想參與如電影及電視的幕前演出:「如果有啱嘅角色都想試吓,可以做啲令人留下深刻印象嘅角色,做好人或者奸角我都OK。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟