由阮小儀主持的香港開電視新節目《小儀與13型男》,繼首集「愛妻型」張繼聰後,新一集請來26歲的「小鮮肉型」俄仔Ansheles擔任嘉賓,跟小儀大玩「姊弟戀」,期間俄仔除了帶小儀玩跳彈床外,又帶她玩VR,令小儀疲累不堪。
俄仔表示未試過「姊弟戀」,揚言年紀太大的女士並非他那杯茶:「喺俄羅斯,姊弟戀唔普遍,俄羅斯女仔會鍾意啲成熟型男仔。我接唔接受到姊弟戀?大過我5、6年都接受到,但如果再大啲,就變咗好似媽咪型咁,唔係我cup of tea。」俄仔指自己的理想對象年齡介乎23-29歲,他謂:「如果嗰女仔年紀愈大,嗰女仔屋企人會畀愈大壓力,要佢結婚生仔,但我自己係一個小朋友,未想生小朋友住。」
跟「小鮮肉型」約會,對小儀來說絕非易事,俄仔帶小儀大玩跳彈床,期間小儀表現驚青,不時大叫好驚,事後她一臉疲倦表示:「體能上我盡量配合,但我需要抖,而我抖嘅時候,佢就自己喺度玩,好明顯佢仲有好多Energy,但姐姐我就已經唔得喇。」
此外,談到戀愛經歷,俄仔表示5歲初戀,不過被對方請他食「檸檬」,他又透露曾經跟香港女仔拍拖,而問到香港女仔跟俄羅斯女仔的分別,俄仔表示:「俄羅斯女仔大家都覺得好靚,不過靚嘅時間好短,香港或亞洲女仔Keep得好啲。」
