林子博讚子女演技值九分

林子博早前經歷喪妻之痛,但他堅持與一對子女完成拍攝點播平台宣傳片。子博指工作可以分散注意力,不用留在家中睹物思人。他又對子女的拍攝表現感到滿意,直言他們的演技有九分。

林子博一家三口拍攝視點播平台宣傳片。

前無綫娛樂新聞台主播林子博早前與大女詠渝及細仔卓楠,為本地影視點播平台hmvod新推出的「裸眼3D」拍攝五條宣傳片,拍攝日期及場地早已定好,未料在拍攝前數天,子博太太不幸病逝,廣告商非常體恤子博情況,主動提出取消所有拍攝,待子博一家心情稍為平復後才擇日再拍,但子博堅持不改期,如常開工,且整個拍攝過程表現專業。拍攝當日,一對小朋友聽話又乖巧,加上他們曾有演出經驗,所以極其順利,當子女在拍攝時,子博更在旁為他們影相及拍片。

林子博為子女影相及拍片。

宣傳片中有一幕要拍三人一齊躺於床上睇手機,又有一幕係子博捧蛋糕被囝囝時被水槍噴臉,林氏這一家都拍得好開心,子博笑說:「同細路拍嘢都有經驗,但今日特別啲,壓力冇咁大。平日我要篤住佢哋背稿俾反應,今日呢個宣傳片正呀,係冇對白,對我就冇咗呢方面壓力,小朋友都做得好開心,係寓工作於娛樂。」提到仔女的表現,子博亦感滿意,他說:「我俾九分,佢哋好自然,做到導演要求,同埋聽話唔嗌交,因為平日佢哋成日嗌交好煩,阿仔又郁手郁腳,家姐好怕佢呢啲嘢,今日算係合作,俾面我。」子博又指其實堅持如期開工對一家人都係好事:「開頭我都驚今日開工取消,唔係因為我可唔可以咁快回復情緒開工,怕工作人員關心我使唔使抖一抖?反而我唔想,始終太太走咗都唔想成日喺屋企對住四幅牆,睹物思人,帶啲小朋友出去抖下氣行下街,分散注意力。」

林子博經歷喪妻之痛,但仍堅持工作。

「裸眼3D」的技術是指觀眾毋需配戴傳統的立體眼鏡,只要在手機加上3D螢幕保護貼,直接睇mon就欣賞到有3D效果的指定電影。「裸眼3D」系列暫時推出16部電影,包括《復仇者聯盟3:無限之戰》、《復仇者聯盟4:終局之戰》、《魔雪奇緣2》、《獅子王》、《少年PI的奇幻漂流》、《迷你兵團》、《3D肉蒲團之極樂寶鑑》、《阿凡達》、《侏羅紀世界》、《水行俠》、《末日先鋒:戰甲飛車》、《玉蒲團之偷情寶鑑》、《英雄本色》、《鐵達尼號》、《神奇女俠》、《哈利波特:神秘的魔法石》。另一部重頭燒腦大片《TENET天能》的「裸眼3D」版,則會在聖誕隆重推出。

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟