「港版石原里美」鄭嘉欣處女拍劇 小肥教路叫放鬆

有「港版石原里美」之稱的鄭嘉欣(Christine),於處女劇飾演四處收兵的拜金港女。她坦言背熟對白但因太緊張,搞到拍攝時多NG,幸得同場的小肥叫她放鬆,未有給她壓力。

鄭嘉欣於處女劇飾演拜金港女。

Viu TV《全民造星III》參賽者鄭嘉欣於網劇《把砒霜留給自己》之單元《水底三十尺》飾演小肥女友,劇集是她的處女演出,她覺得背對白最難,又坦言NG多次,幸好小肥體諒,更安慰及鼓勵她:「其實我背熟晒啲對白,但係可能太緊張,同埋第一次拍,好多時食螺絲,緊張到一片空白。我有兩組戲,第一次嘅時候NG好多次,小肥係一個好好嘅人,佢冇唔耐煩,同我講『你放鬆啲啦,唔好咁緊張』,一啲壓力都冇俾我。」

鄭嘉欣於網劇飾演小肥女友。

對於被封為「港版石原里美」,Christine笑稱感到很開心:「石原里美係一個好靚、喺日本好當紅嘅女星,稱呼我係『港版石原里美』其實好開心,但都覺得擔當唔起呢個名。」她又稱自己在節目中好俾心機好努力,但對住鏡頭太怕醜,未能好好表現自己,不過她對參賽依然有信心。

鄭嘉欣被封為「港版石原里美」。
小肥飲鹹水幾乎嘔

小肥於劇中拍跳海浸親的戲份,他形容難到不得了:「因為沙又拮,工作人員為免我拮親腳有俾水靴我,但又唔可以穿崩,所以幾麻煩,尤其有幾幕喺船度跳落去更加唔可以有靴,船又窄又多利器要小心行,要赤腳,咁海有浪、條船四圍擺,嗰日又凍,好多嘢好難控制,拍咗好多次、跳咗好多次,幾乎拍到嘔。」戲中小肥常被朋友取笑、欺凌,他笑言現實中的身邊朋友都口賤:「但未去到欺凌,因為我都唔差,人哋mean我,我可能mean過人十倍,分分鐘俾我欺凌番。」

小肥坐艇拍跳海戲險嘔吐大作。
浪大船搖,小肥未跳海已經暈暈地。
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟