朱茵工作中過生日獲劇組送驚喜 黃貫中隔空冧歌賀壽

「童顏仙子」朱茵昨日(1025日)迎來49歲生日,向來家庭行先的她,近日為電影《雨打芭蕉》長駐內地開工,無奈與老公黃貫中(Paul)和愛女黃鶯分隔兩地,不過壽星女仍然集萬千寵愛在一身,除了獲愛人隔空送歌,劇組更精心炮製「驚」喜派對,令她好不感動。

朱茵49歲生日,獲老公黃貫中隔空冧歌賀壽。

朱茵連日來忙於為電影趕工,就連生日也在拍攝中度過,提到兩位摯愛,她笑指老公早已「遙距送禮」:「囡囡同老公向來都好重視我生日,噚晚我收夜,收工已經到咗生日,不過因為網絡問題,接唔到老公電話,令佢好焦急咁搵我,最後佢唱咗生日歌畀我聽,今日亦都唱咗,所以我帶住愉快嘅心情開工。其實喺工作中度過生日係一個好兆頭,寓意全年富足圓滿。」

雖然與摯愛小別,但女神絕不孤單,昨日更獲劇組送上「驚」喜:「成組人叫我入房,好嚴肅咁同我講,今日嘅戲要重拍,我心諗:『唔好啦,就快煞科喇,唔想浪費大家嘅心血。』但係佢哋講得好有說服力,我又覺得係喎,啲光好似唔連戲,最後佢哋仲差啲發火!點知工作人員突然播咗段片,內容係《雨打芭蕉》嘅劇照、我喺片場嘅快樂片段,令我好感動。」與劇組朝夕相對接近一個月,感性的朱茵直呼不捨,「雖然仲有幾日先煞科,但係我已經好唔捨得呢班好努力、而且熱愛電影嘅年青人,佢哋係我身邊嘅小天使。」

朱茵獲劇組驚喜慶生。

電影《雨打芭蕉》是一部以中產家庭為支點,延展出兩個家族、涵蓋三代人的故事,朱茵透露劇組先後到芭蕉田、學校等多個地方取景,製作認真,她還直言故事喚醒了她的正能量:「人生雖然會遇上唔同嘅風浪,但係我哋並唔會因為呢啲風浪而停止,所以無論前面遇到乜嘢困難,我哋都要勇敢衝過去,前路一定會更好。」

提到今年的生日願望,朱茵坦言將願望留給《雨打芭蕉》,祝願電影取得佳績;同時還表示外柔內剛的「吳霜」一角,是她的轉型之作:「我好期待呢部電影,因為同我以往接拍嘅角色好唔同,呢部戲可以話係轉型作!《雨打芭蕉》係一部好貼地嘅藝術電影,將好多現況透過電影話俾大家聽,希望入場嘅觀眾朋友會感同身受。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟