石詠莉成微電影影后 與鄧健泓浸浴慶祝

石詠莉(Sukie)憑微電影《Dreams come true》成為微電影影后,而負責執導的鄧健泓(Patrick)亦奪「最佳微電影製作大獎」銅獎,可謂雙喜臨門。Patrick透露Sukie得悉獲獎後如小孩般彈起尖叫,又笑言會浸浴慶祝。

石詠莉浸浴,與鄧健泓慶祝。

「第七屆創+作微電影支援計劃(音樂篇)」(專業組)昨日在網上公賽果,擔任微電影《Dreams come true》女主角的Sukie摘下「最佳微電影女主角」金獎。而Patrick首次執導即獲「最佳微電影製作大獎」銅獎。Patrick對老婆奪獎感到驕傲,想起Sukie獲悉得獎後一刻開心到跳起的反應,他不禁笑說:「啲人成日話開心到跳起或者開心到飛起,Sukie等緊賽果時,第三名第二名唔係佢,咁佢有啲緊張,原本佢係坐喺度,到知道自己得金獎時,佢好大聲嗌咗出嚟,然後跳高咗,不停跳咗三四吓,咁我當要配合佢企起身,佢就捉住我隻手,好似小朋友攞獎咁,佢尖叫嘅歡呼聲,上下五層樓都應該聽到。」

石詠莉家中著睡衣等候賽果公布。

成為微電影影后的Sukie,直言獲獎受寵若驚,並笑說:「呢次網上舉行頒獎禮新鮮感好大,喺收到消息嘅時候我係開心到彈起咗同尖叫,重點係我冇諗過自己可以彈到咁高!哈哈!呢次喺屋企着住睡衣、唔化妝等消息公布都係好大體會,可以盡情嗌,將自己嘅興奮表露無遺,呢樣係前所未有嘅開心,好多謝每位喜歡呢部微電影嘅朋友,希望未來有更多電影作品俾大家睇到,亦都希望自己有多啲機會做演員,原來演戲真係好好玩。」Sukie又大讚老公功不可沒,令她拿到這個獎項。她又多謝台前幕後每一位人員,用好大努力去做每一件事。

石詠莉摘微電影影后得開心到狂嗌。

Patrick 之前親力親為太太製作唱片,屢次取得佳績,回想這幾年種種都有點百感交集︰「以往睇住Sukie喺IFPI創造奇績,用自己雙手喺冇人幫嘅情況下,佢嘅唱片攞到銷量獎,今日又喺佢身邊見證住攞個女演員獎,好難形容嗰種靠自己努力換嚟認同,好值得記住呢個咁有意思嘅時刻,希望我哋嘅努力,可以換嚟更加多嘅工作機會。」至於倆口子會如何慶祝?Patrick笑謂:「我哋嘅慶祝方法係浸浴。」

石詠莉憑微電影《Dreams come true》獲獎。
《Dreams come true》今年六月於洛杉磯電影獎(LAFA)(Los Angeles Film Awards)奪「最佳新導演(短片)」。
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟