蔡瀚億鄧月平分開配音隔空談情

蔡瀚億(BabyJohn)和鄧月平(Larine)在三年前的賀歲片《小男人週記3之吾家有喜》中首結片緣,飾演一對戀人,近日兩人在hmvod粵語版3D動漫動畫連續劇《西遊》及電影版《西遊之再見悟空》分別聲演一對戀人白狼和龍女,但由於配音日子不同,所以緣慳一面,只能隔空談情。

鄧月平飾演龍女。
蔡瀚億聲演白狼。

《西遊》是全新故事,講述唐僧師徒在取經後相隔十六年再踏西天之路,BabyJohn 聲演的「白狼」是新加入的唐僧徒兒,極之好揪,BabyJohn 說:「佢本來係一隻狼,因為修練人化咗,成為一個有武功底嘅狼人,故仔一開始佢嘅設定係一個好純真嘅人,有一個小小嘅壞習慣,佢係漏口嘅,有陣時講嘢甩甩咳咳,但喺佢認為一啲啱嘅事、覺得要鼓起勇氣嘅事上面,講嘢就會好口齒伶俐同埋好精準,但呢個角色都有迷失嘅時候。」漏口狼人會否比較難聲演?他說:「甩牙唔算好難演繹,因為動漫做得好仔細,眼神畫得好靚好真實,自己做都容易代入人物,最難反而係多打鬥場面,好多大叫、打嘅氣聲,配音都一樣好攰。」

BabyJohn在配音工作上甚具經驗,「白狼」打鬥多,所以配音都幾攞膽,問到有否養聲之道,他笑說:「我嘅養聲方法係一路配音一路飲水,一行架步水呀、咖啡呀咁 set 晒喺度,我今日有帶生果食,間唔中又抖吓。配音都係我鍾意同擅長嘅嘢,之前讀書(演藝學院)都學過。」

除了自備水果潤喉,BabyJohn亦有自備私家餐具,他稱這個習慣是受到 Viu TV 節目《空肚講宵夜》影響,因為大家經常試食,用私家餐具較環保及安全,而拍檔梁祖堯亦有教他煮飯,令他開始入廚,現時他懂得做西多、炒蛋、蒸魚、炒菜,不過配音當日,他點了牛柳絲炒意粉,外賣一到他不禁說:「好掛住呢啲開工飯盒,快啲返片場就好啦。」

蔡瀚億話最難大叫同打嘅氣聲。

至於鄧月平係首次為動漫配音,開工當日,作者鄭健和曾到場探班並送她角色畫板留念。提到其聲演角色多變,Larine 表示:「我聲演嘅係『奇經』、『小羽』、一個『小龍女』嘅角色,但三個角色都係同一個人,我一入去配音室,第一個聲演係細路女嘅『小龍女』,跟住係大個咗嘅『小龍女』,跟住到一本經書,再到一個死咗嘅『小龍女』,再到一個靈魂,我覺得非常有趣同埋好玩,都有難度同埋學到好多嘢。」

今次同BabyJohn再聲演一對,Larine對此笑說:「疫情唔使見面都可以再續前緣,我聽『白狼』把聲咁熟口面,原來係 BabyJohn,『白狼』同『小羽』嘅愛情線都幾精彩!今日有一件事好巧合同大家分享,我同『小羽』撞咗衫,但我哋係冇襯過,我哋靈魂之中有交接,現實中我同『小羽』都幾襯,都幾鍾意考慮人同保護人。」

鄧月平指角色與她相襯。

《西遊》角色家傳戶喻,若要揀一個人物做男朋友,問 Larine 會選擇誰?她笑說:「一定唔會揀豬八戒,因為太花心,我唔鍾意花心男仔,我會選擇孫悟空或者唐三藏。其實我幾鍾意佛系男仔,乜都唔講又心繫蒼生;孫悟空好百厭好曵,我自己有另一面都幾百厭,但唐三藏不近女色,所以都係選擇孫悟空,無謂誤人前途。」

 

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟