何依婷上位在望宣佈告別兒童節目

由

2020-05-12 09:13

2017年港姐亞軍何依婷(Regina)樣子甜美省鏡，近期憑住《機場特警》性感KOL安安一角，大騷長腿小背心，更瞓身在劇中讓楊明摸大髀，人氣急升，不但被封為新一代宅男女神，在無綫鬧花旦荒下，更有機會被力捧上位，參加更多劇集演出。自入行後便一直主持無綫兒童節目《Think Big天地》的Regina，昨日在ig宣佈將離開Think Big團隊。

她表示，感恩入行第一個節目可以加入Think Big做主持，「轉眼間已經兩年多，從前經歷過師兄師姊的畢業離開，無諗過咁快就到我畢業了。呢兩年既(嘅)訓練入面，學會嘅嘢真係好多，更識到一班好朋友、好同事，同你哋一齊返工傾計食飯玩狼人，真係好開心，好唔捨得大家，好唔捨得Think Big一班幕後既(嘅)工作人員，亦好掛住疫情前一班小朋友上黎(嚟)同我哋一齊玩既(嘅)時光。每次見到小朋友玩得開心，樂天可愛既(嘅)笑容都會覺得好溫暖，就算拍攝要企足全日、講足全日都係值得既(嘅)。」

Rrgina又再次感謝Think Big團隊一路的照顧和鼓勵，相信大家還有好多機會在其他節目碰面，再感觸地表示：「Thank you and love you all！」

其實過去有好多當紅女星都在兒童節目出身，包括朱茵、曾華倩及藍潔英等都主持過兒童節目，Regina亦有望與一眾前輩睇齊在娛樂圈打出名堂。