【賀歲片大戰!】林敏驄首次執導拍《如珠如寶》 對撼曾志偉監製喜劇

圖︰19年賀歲片檔期認真精彩,除咗有林敏聰首次執導嘅《如珠如寶》,亦有王祖藍首次執導、曾志偉監製嘅《你咪理,我愛你!》。(ig、網上圖片)

59歲林敏驄今年首次自編、自導、自演電影《如珠如寶》,加入賀歲片「戰圈」;更被形容為「對撼」曾志偉監製、王祖藍執導嘅《你咪理,我愛你!》。最近,呢兩部賀歲片都開拍中,演員陣容亦開始曝光!

《如珠如寶》方面,林敏驄搵來張繼聰、王菀之、林盛斌(Bob)等人參演,林敏驄今日(9日)受訪時透露,「(呢部電影)笑得嚟呢,就好感人嘅!」唔知講真定講笑,部戲竟然係冇劇本嘅?張繼聰指,「成個劇組好環保,冇劇本,紙仔都冇得飛;淨係知故仔係講兩代承傳。」林敏驄即笑言︰「拍完咪有(劇本)囉!」

搵張繼聰用美色 打動恬妞參演?

除咗以上3位演員,林敏驄仲搵到香港觀眾好耐冇見嘅恬妞參演!林敏驄話,「我叫佢(張繼聰)用美色引誘恬妞嚟開工。」至於今次電影,檔期同老拍檔曾志偉監製嘅《你咪理,我愛你!》撞到正,林敏驄笑言︰「志偉?佢一年畀人打好多次喎!(有對手?) 唔會,我對手咪喺我身上囉。」佢仲話《如珠如寶》將會有好多神秘「串星」加盟,製作費大約5、6千萬港元。

至於《你咪理,我愛你!》方面,自導、自演嘅王祖藍都係首次執導,仲搵埋樂壇天后容祖兒參演!祖兒昨日(8日)於ig分享佢同王祖藍拍對手戲,留言話︰「有人第一次執導就搵我來演,仲要同佢要談情說愛,我認為呢件事都幾沙膽。」

《你咪理,我愛你!》近60人參演

《你咪理,我愛你!》改篇自百老匯音樂劇《I Love You, You Are Perfect, Now Change》;邵美君、梁祖堯、湯駿業、楊詩敏(蝦頭),亦曾主演此劇的香港舞台劇版,此劇更曾在港多次重演。王祖藍今次將故事改成富香港情懷嘅賀歲歌舞片,仲一口氣搵咗近60人參與拍攝,認真大陣仗!

王祖藍早前接受訪問時坦言,「(拍《你咪理,我愛你!》)難度高過正常一部戲,當動作片咁拍,時間同資源上係大挑戰;不過香港電影人最勁嘅地方就係乜都做得到!」

而除咗以上兩部賀歲片,目前已宣佈開拍嘅同期電影仲有丁仕昀執導嘅《玩轉全家福》,仲有彭浩翔執導嘅《恭喜八婆》,2019農曆新年嘅影壇,真係好精彩呀!

圖︰祖兒參演《你咪理,我愛你!》,仲同王祖藍有感情戲。(ig圖片)
圖︰林敏聰嘅《如珠如寶》,就搵來恬妞姐參演。(fb圖片)
圖︰彭浩翔亦即將開拍賀歲片《恭喜八婆》,加入2019年賀歲片「戰圈」。(fb圖片)
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟