陳百祥(阿叻)於8月港姐競選當晚，大爆曾志偉於橫店投資酒店，仲話志偉投資7億，連同周邊嘅地總值30、40億，係「橫店富豪」！志偉昨日(18日)晚上受訪時，承認有投資酒店，但強調自己只係佔少少股份，買一兩間啦！咁究竟係一兩家酒店，定一兩間酒店房呀？
志偉被封殺？ 阿叻︰點封殺幾十億身家嘅老闆
阿叻昨日(18日)下午出席活動，又再講起志偉投資酒店。阿叻先話自己「冇收到」志偉邀請佢去《黃金兄弟》首映禮，「都唔知有冇當我好朋友，發咗達唔理人喇！」談到志偉被TVB封殺一事，阿叻又爆志偉位於橫店嘅酒店就嚟開幕：「點封殺一個有幾十億身家嘅老闆呢？」
講到咁detail，但志偉當晚出席首映時就話：「我今朝特登叮囑製片，話叻哥要親自打電話㗎，你要記住！我頭先再問：『打咗未打咗未？』佢哋話打咗喇。不過你知叻哥不嬲都係咁講㗎喇，佢唔得閒嚟，就會話我冇打㗎喇！」志偉又話︰「叻哥上次話我幾廿億買酒店，同佢俾貼士一樣，係唔可信㗎！」
又話如果自己係「橫店富豪」，「我仲使做咩？我坐喺度啦！」志偉否認指，「梗係唔係啦，打工仔！」至於開酒店一事，志偉就承認此事，但強調只係佔少少股份，「因為橫店我哋拍戲成日都會住，咁買一兩間，朋友拍戲都會住嗰度。」一兩間？志偉話：「係咁上下啫，係咁上下啫！」定係一兩棟？志偉就話：「冇喇冇喇，邊有咁勁吖！」大家又會信邊個呢？
【#有禮送】下載 @ 流動新聞 📱手機APP！玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎！🤟
