同蔡少芬齊煮賀年菜 陳法蓉「大牌」唔肯做契媽

恭喜發財!踏入新春佳節,蔡少芬(Ada)與陳法蓉(Monica)實行搞搞新意思,齊齊大煮兩度賀年菜:「萬事如意五福袋」、「招菜進寶黃金蝦」,跟大家拜年。兩位相識逾20載的好閨密,難得首次共同下廚,即「針鋒相對」笑料百出,當中Ada更大爆Monica大派「檸檬」拒絕跟他兒子張樂兒上契。

蔡少芬(Ada)與陳法蓉(Monica)齊齊大煮兩度賀年菜。

現身煮場的Ada與Monica表現有板有眼,無論洗丶切、煎、炒皆無所不曉,絕對係「美貌與廚藝並重」,當中自誇「煮咩都OK」的Ada,透露閒時經常入廚,就連囡囡返學的飯盒、點心均由她一手準備,但自從兒子出世後,忙於照顧兒子,才疏於入廚;其後,Ada又向Monica「笠高帽」表示:「其實我哋兩個煮嘢都叻,叻喺唔同範疇,Monica蒸嘢好叻!」Monica聞言即沾沾自喜說:「係呀,曾經喺蔡瀾節目,煮過冬菇煀雞,蔡瀾試食後話係佢食過最好食嘅冬菇煀雞。」身旁Ada即神回:「係咪蔡瀾從來未食過咋!」此話一出即全場哄笑。

怕做契媽分身家

Ada與Monica無所不談,提到過往張晉亦曾為Ada下廚時,Ada即問Monica:「你有冇煮過嘢食畀男朋友?」Monica亦大方表示:「一定有,而且我煮一定會好食,因為我用愛心煮,通常都係簡單菜式。」在烹調過程中,Ada竟大爆秘密:「我本身打算契個仔畀佢(即Monica),等佢有條仔,而且仲要係靚仔添,點知佢唔肯,我老公都叫我唔好迫佢。」Monica反擊表示:「點解要契呀?分身家畀你個仔呀?我有好多朋友都有小朋友,好難個個契,而且我又好鍾意你細囡,唔通囡我就唔契,仔就契咩?既然我同你關係咁好,唔使契啦。」

Ada原先想契個仔給佢Monica,卻慘食檸檬。

難忘初遇獲賞識

除了「針鋒相對」,其實Ada與Monica亦有曬溫馨的一面,Ada透露當年參選港姐時,曾在髪型屋撞見Monica,這是她們第一次遇見,Ada說:「當時陳法蓉已經係港姐冠軍、雍容華貴嘅大明星,而我只是其中一位參選佳麗,點知轉頭有個髮型師走埋嚟同我講『有人讚你靚喎!陳法蓉讚你!』我開心到幾晚瞓唔着。」

粉絲互罵改花名

提到她們第一次合作出埠到台灣,在Monica眼中,Ada是不停做運動,就算得幾級樓梯,她都刻意行上行落,而Ada眼中Monica,是個很懂照顧人的女仔,Ada謂:「佢全程幫我翻譯國語,我心諗『點解會有一個心哋咁好,又咁靚嘅女仔』。」Ada與Monica又憶述03年合作大陸劇《水月洞天》,當時大家的粉絲在網上互鬧,Monica指:「我啲粉絲鬧Ada做『冇飯食嘅排骨』,而佢啲粉絲鬧我做『匿喺濛鏡後嘅老妖怪』,之後我哋拖住手同啲粉絲講,其實我哋真係Friend,跟住先再冇互罵。」

 

分享: