【聖誕節】中大被捕學生:家人看心理醫生 踎臭格想死學位考牌前途堪憂

「給香港人:

「你哋好,我係中大嘅被捕同學,被告暴動。被捕後嘅日子唔易過,一邊要繼續面對社會運動嘅動盪,睇住警察繼續暴力,手足被捕,政府無恥嘅行為,但係自己已經唔可以再出去同手足共同進退,感到一股龐大嘅無力感。如是者,我每一日都係覺得運動好絕望同仲有啲希望嘅循環之中。

「係呢場時代革命的發展同時,更加大嘅壓力來自傷心嘅家人同自己一片未知嘅前途,家人好擔心我嘅前景,甚至需要睇心理醫生,但係我自己又唔知點樣可以安慰到佢哋。佢哋唔係好想我再參與甚至留意運動,但係我做唔到,我唔可以離棄博命緊嘅手足。所以同家人關係都唔係太好。

「每日睇住新聞,仲要讀一個唔知攞唔攞到嘅學位,考一個唔知自己會唔會考到嘅牌,夢想做一個唔知仲有冇機會做嘅行業。同時,睇住法庭嘅消息,就會諗自己遲啲會唔會俾人告多幾條罪,到底會坐幾多年監,到底呢個世界有冇公義?

「但係當我一諗到被還押嘅手足,我就知道我絕對唔可以放棄,我嘅痛苦,我哋嘅痛苦同佢哋比算係啲乜嘢。我淨係坐過兩三日臭格已經想死,佢哋已經坐左幾個月。為咗佢哋,為咗更多為呢個運動已經犧牲左嘅人,我哋絕對唔可以放棄。好似梁天琦所講,所有你認為對呢個運動有幫助嘅嘢就要做,你覺得食黃店捐錢有幫助嘅,做啊;你覺得繼續和理非集會有幫助嘅,做啊;你覺得繼續做地下勇武有幫助嘅,做啊。

「總之唔可以做嘅就係忘記,盲目,冷漠,絕望。永遠要記得政權對我哋做嘅所有嘢,時刻警惕。依個政權對我哋係唔會有任何嘅仁慈,依一場係一場漫長嘅戰爭,我哋一放鬆就會換來對手嘅步步進逼。

「老實講,我已經決定咗,如果最後係要坐監,坐完出嚟我都會繼續抗爭,我已經決定咗呢一生人都要繼續同呢個邪惡嘅政權對抗,用一生去追求公義,良知,自由同民主。因為只要係啱嘅事,代價幾大都係值得嘅。

「我唔知道有幾多人會繼續同我行落去,但係我知道我並不孤單,政權就係想我哋覺得我哋孤單我哋係少數咁打敗我哋,我話俾你知我哋絕對唔係少數。希望睇完呢封信嘅你都會肯繼續同我行落去,行到去煲底相認嘅一日。

最後以一段聖經作結尾:
「為義受逼迫的人有福了! 因為天國是他們的。
馬太福音 5:10

祝大家聖誕快樂,平平安安。」

分享:
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟