重提患腦膜炎 韓瑪利:一隻腳叉落鬼門關

由蘇志威創立的舞蹈演藝學院,日前舉行記者會。擔任學院董事、早前患上腦膜炎的韓馬利(Mary)首次公開現身,只見她經過連月休養後,已逐漸回復狀態,精神不俗。提起病發經過,Mary仍有餘悸。表示當時突然發燒兩日,被老公捉去睇醫生,結果陷入昏迷。她說:「以為食退燒藥就得,一去睇醫生就叫我即刻入院,佢一講完就斷片好模糊,直接入院不省人事,又唔係發高燒,估唔到有咁大反應。醫生仲一度話我一隻腳叉咗落鬼門關再拉番我上嚟。」

8月患上腦膜炎一度陷入昏迷的韓瑪利,經過數月休養,病後首度現身精神不俗。(網上圖片)

她直言自己今次大病嚇壞老公:「結婚30幾年都冇見過佢咁驚、咁緊張、咁細心,好彩自己有做開運動,冇抵抗力情況會更差。」正接受中西合璧治療的她,要食半年血清素:「吊咗3個星期消炎藥,搞到散晒冇力、出晒冷汗,後期仲有抑鬱,所以要食血清素,因為驚翻發,中醫就係調理。」

韓瑪利日前出席蘇志威的舞蹈演藝學院記者會,提起這次大病仍猶有餘悸。(網上圖片)

她指自己病重時體重大跌7公斤,現成功增肥5公斤:「當時食唔到好無奈、好辛苦、好慘,朋友又幫唔到自己,叫我諗啲開心嘢,但情緒低落係控制唔到,經過今次病之後,都有諗餘下生命點過,以前太忙,依家好享受慢活生活,覺得每日擘大到眼唔係必然,食到嘢、抖到氣已經好感恩。」

已有一段時間沒有出席公開場合的鄺美雲,亦有現身記者會。(網上圖片)
分享: