微博留言祝賀國慶 張敬軒IG被網民狙擊

連月來反修訂《逃犯條例》的示威持續,而以十一國慶當日最為激烈,香港各區發生多宗警民衝突,而政見分歧亦令家人、朋友關係撕裂,甚至歌迷亦和部份藝人割席。在國慶當天,不少藝人都有在微博祝賀祖國,當中包括成龍、譚詠麟、王祖藍等,而張敬軒也在官方微博留言「祝福祖國生日快樂」。此舉令大批網民在其IG留言狠批。有的網民甚至表示買了軒仔11月演唱會飛,亦要罷睇。被網民連番狙擊的軒仔,在網民留言下逐一反擊。對於被指他在人民幣前跪低,他留言反諷說:「我雙膝只跪我父母。任何貨幣去銀行或找換店都有。」對於有歌迷表示蝕讓演唱會門票亦要罷睇,軒仔回應:「辛苦晒!我仲欠幾張飛,讓畀我,我環保回收唔使你蝕。」

有粉絲認為軒仔在微博的留言是被迫寫的,軒仔說︰「幾廿歲人,迫與唔迫,又唔係搭車迫地鐵,講嚟做乜啫。你記得要帶眼識人,尤其係我呢啲咁嘅藝人,咁嘅人唱埋啲咁嘅歌,再聽都嘥時間。有heart嘅歌手喺呢個地方愈來愈少,你千萬要好好珍惜!」有歌迷斥他是黑白不分的人。軒仔自嘲︰「我簡直係個仆X #不如。」對歌迷表示對他失望,軒仔也有冷靜回應:「讓你失望很對不起,讓人失望從來不是我的初心。」

有網民說軒仔食兩家茶禮真係好核突。軒仔留言說:「1.如果我當年屬意向北發展,我點解唔趁着當年《斷點》紅遍大江南北就直接北上發展?2.我點解要博同情?明知道咁嘅時勢會有咁嘅後果,網絡通達嘅年代真係有兩家茶禮食?一件事嘅發生,唔好淨係睇表面見到嘅嘢。要睇呢種現象,要睇到現象背後嘅嘢。佢唯一嘅功能,就係要畀人見到同討論。」

分享: