返內地拍戲 郭羨妮靠視像幫囡囡溫習

郭羨妮早前被爆售出將軍澳物業,搬到九龍區居住,而帳面亦有300多萬進帳,日前她出席兒童時裝周記者會,對賣樓一事直認不諱。她說:「其實搬到九龍之後同囡囡都覺得好開心,因為之前囡囡要朝早5時起身搭校車,來回車程時間要3個鐘,宜家佢可以瞓到7點起身,使咁多錢搬屋都係為咗佢。」郭羨妮笑言由於九龍區的樓價較貴,因此要努力工作。

對於在內地拍《尋秦記》,郭羨妮坦言感到辛苦:「啱啱拍嘅時候着羽絨,後嚟愈來愈熱,着上戲服已經汗流浹背。」她又指拍戲初期撞正7歲囡囡上學期大考,她只可以透過視像幫她溫習書本!母女倆更因互相掛念而爆喊,她說:「囡囡宜家聽到我要做嘢就好驚,成日怕我唔返屋企瞓。」整個暑假女兒交由郭母照料,令她感到十分內疚。她說:「戲太過體力透支,完成呢套戲後,我會有一段時間休息陪吓個女。」

分享: