分享人生起跌 薛家燕:一生人係好開心嘅

薛家燕日前出席了一個分享會,大談婚後息影,到離婚復出的點滴,當中有悲有喜。當年家燕姐息影後,由幕前轉到幕後,到馬來西亞做錄影帶生意,她說:「嗰時我同朋友一齊做錄影帶生意,我攞咗無綫同麗的嘅劇集代理權,個市場好大,但啲翻版好犀利,曾經有人嚟到中國香港拍枱同我講『你嚟到馬來西亞因住!』去到馬來西亞有6個保鑣陪住我,住嘅酒店突然間熄晒燈,上台講嘢突然間冇晒電,好驚!」

至家燕姐離婚,母兼父職,三個子女可說是她的精神支柱。當時她想返無綫拍《真情》,獲大女兒支持,令家燕姐感動非常,「有一日珊珊(指大女兒)就同我講︰『媽咪,咁你去拍啦!我會幫你照顧弟弟同妹妹!』當時佢好細,識得咁同我講,我攬住佢喊,媽咪就係好想聽到有人支持。」

後來幸得好友黎小田幫忙,為她與無綫傾價錢,家燕姐說:「黎小田幫我搵藝員科嘅總管Ben Chan,問佢︰『你做乜烚家燕?俾咁奀人工佢?』之後第二日珍姐就搵我,仲俾咗一個當紅小生嘅價錢我,哈哈!」面對過人生的高低潮,現時家燕姐也認為自己的人生也是好開心的,「我一生人係好開心嘅,之前有好嘅家庭,有個好嘅星運,3個好撐我、好為我著想嘅仔女,雖然離婚係最唔開心,不過倒番轉嚟講,冇呢個男人又點會有3個仔女呢?嚟近希望快啲抱孫,啲女快啲結婚啦!」

分享: