【是但噏】林海峰Talk Show大爆兒時奀皮 更想登報脫離母子關係

商台DJ林海峰(Jan)有好多個朝早都沒有主持《在晴朗的一天出發》,因為要好好準備個人Talk Show《林海峰是但噏Happy Monday 2019》。而在昨日首場正式在紅館開鑼,Jan談到兒時奀皮,被阿媽用藤條打:「我媽咪好弗呀,揸住藤條時特別弗,唔知點解,佢弗我時好有趣,每弗一下會講一個罪證:曳呀﹑弗;唔聽話喇,弗;駁嘴呀,弗;佢弗我弗得好有潮流品味,呢邊弗三下,右邊弗三下,弗弗弗,一對adidas,我嗰時返小學規定著短褲,全年四季,朝早返學見到我,又買新adidas。」

Jan續說:「有次同細佬(林曉峰)鬧交,然後阿媽話:你兩個唔好嘈,兩個都打,打打打,打到藤條爛埋,突然間唔知我定細佬講咗句『登報同你脫離母子關係』,登報脫離母子關係?當年我小學,我唔睇報紙,字都唔識多隻,只睇幪面超人。點登呀?寫咩呀?『本人林海峰與曉峰,因為太多adidas關係,現在宣布同阿媽脫離母子關係咁樣呀?』定係玩大佢,聯署聲明囉,搵埋家姐阿妹,樓下叉燒炳,隔離鄰舍,告到去聯合國人權理事會…好彩冇好彩冇,點解呀?因為隔離屋有個師奶有兩個仔,咁橋師奶又係姓林嘅,有一日佢兩個仔又係打交,然後個林師奶點樣呀?『你哋兩個唔好嘈,你做乜搵嘢掟佢呢?你又做乜搵支棍毆佢呢?剩係打你一個,你乖,請你食雪糕』,咁點呀,咁之後咪再打得勁啲,打到家變,如果今日仲可以登報,我會咁講:『本人林海峰與細佬曉峰,現感激阿媽多年嚟以公平公正公開方式,嚟處理我兩兄弟,絕無大細超,堪稱慈母一名,現特此聲明公告天下,親生阿媽感激你,不孝子上。」

分享: