邀軒仔做調音師 關智斌:想佢拎支靚咪出嚟

關智斌和張敬軒份屬多年好友,關智斌開騷,相信軒仔亦會出盡力支持。(網上圖片)

藝人關智斌將於9月完紅館夢,近日積極排練的他,早前因操勞過度被送入醫院,不過休息過後已恢復精力。日前他接受TVB娛樂新聞台節目《StarTalk》訪問,大談首踏紅館開個人演唱會感受。他說:「冇諗過可以開個人演唱會,好Dramatic,用坐過山車形容都啱,因為自己一直係組合出身,就算係都係諗住以組合形式上紅館舞台,上天嘅安排好奇妙,用另一個方式畀咗個舞台我,我會好好珍惜。依家Rundown全部改晒,之前個主題比較開心,嘉年華Feel,但已經唔Work,我用咗一個星期諗點改動,決定用我呢次經歷呈現。」

而關智斌今次紅館騷,英皇藝人幾乎傾巢而出。而提到嘉賓之一的張敬軒時,關智斌表示:「希望可以邀請到佢做調音師,想叫佢攞啲好靚嘅咪出嚟,佢啲器材太靚,有時佢冇啦啦會拎出嚟話Beyoncé用呢支。佢喺一班朋友中係最令人安心嗰個,大家會覺得如果有佢喺度會特別安心,所以呢兩場要佢嚟等我淡定啲。」

分享: