李克勤幫觀眾爭取福利 叫容祖兒唱夜啲

容祖兒首場演唱會因機件故障,觀眾留下票尾可以再睇多場。昨晚擔任嘉賓的李克勤為觀眾爭取「福利」:「咁樣係對其他十七場觀眾唔公平!」即場叫祖兒「唱夜啲」補數。

李克勤為容祖兒演唱會擔任嘉賓。

《Pretty Crazy容祖兒演唱會》舉行第五場,楊受成先生夫人,莫文蔚、毛舜筠、陳志雲、李幸倪(Gin Lee)、曾樂彤等均有來捧場。容祖兒昨晚請來李克勤任嘉賓,二人合唱《月半小夜曲》及《刻不容緩》。

不少嘉賓捧場。

克勤一上台就大讚祖兒個騷勁:「嘩,真係要恭喜要你先!個騷真係好犀利!成晚係對眼未停過,好忙!」他又笑指着頭頂的舞台設計說:「佢哋話呢件係藝術品!我個人覺得設計師個靈感一定係來自我哋個蚊香!」語畢引來全場大笑,祖兒更加笑到企不穩,正當想反駁時,克勤已經又再搶白:「今日第五場真係唔夠第一場有福呀!第一場個班可以留低票尾再睇多場!聽講話有機件故障,所以可以睇多場。」即時引起觀眾起哄。祖兒說:「係呀,個晚成個台升唔到喎….. 」料不到克勤反問:「咁樣係對其他十七場觀眾唔公平囉!你地話係咪先!」觀眾即時狂歡呼拍掌大叫支持,克勤再搞笑謂:「我剛剛去廁所個沖水有故障呀,我係咪可以睇多場先。」笑到祖兒無力招架,大叫「痴線」。

容祖兒昨晚舉行第五場演唱會。

克勤持續為觀眾爭取福利:「我唔知你點搞啦!今晚星期五大家冇咩做,你一係唱夜啲補番!反正你好多歌都未唱。」祖兒說:「你手指拗出唔拗入呀你!你講啦你,你同我睇到開燈先好走呀!咪同我講話你趕住湊仔!」克勤並未被祖兒大到:「我今晚帶晒全家來睇呀!怕你呀!哈哈!」

容祖兒與李克勤互鬥嘴。

兩人合唱《刻不容緩》後,克勤準備返落台,但太心急之下,竟然企錯升降台邊口位,險出意外。祖兒見狀九秒九飛撲過去攬着他的腰,把他拉回來:「行錯路啦你…..差啲!呢度降你落去呀,阿哥!」救回克勤一命。

容祖兒勁歌熱舞。

——————————
【#有禮送】下載 @ 流動新聞 📱手機APP!玩遊戲
💌送你百佳禮券
🍺送你德國手工啤
👉👉一玩即知中咩獎!🤟
—————————–

分享: