首映禮星光熠熠 古仔鎮宇家輝互窒

雲集三大影帝古天樂、吳鎮宇及張家輝合演的新戲《使徒行者2諜影行動》昨日(6日)舉行首映禮,現場星光熠熠,出席喜賓除了三大型男外,還包括監製劉偉強、蔡潔、樂易玲、馬德鐘、袁偉豪、張寶兒、呂慧儀、莊思明、莊思敏、陳山聰、譚凱琪、湯盈盈、黎諾懿等,十分熱鬧。

三位影帝在接受訪問時你窒我我寸你,爆發不少「火花」,事緣三人談到緬甸外景的動作戲份,家輝與古仔雖然同聲表示不辛苦,不過古仔卻自爆拍攝最後一場戲時不慎受傷入院:「其實事前準備功夫做得好好,但拍到最後一場爆炸戲,我隻右手撳住玻璃碎,係咁流血,割得好深,入咗當地醫院,最怕影響神經線,但好彩冇事,最後只係鏠咗3針。」吳鎮宇就搶住插嘴話:「3針唔好講啦!我嗰次只係拍文戲,切牛扒都可以切到手指尾,最後都鏠咗兩針啦!」記者問家輝有沒有鏠針﹖他講笑話:「我『jump』樓梯囉!」

提到家輝拍戲時曬黑了不少,他解釋:「因為我要追古仔啲膚色,但黑極都黑唔到,我拍外景時已經不斷曬,都只低咗2度。」古仔就笑着說:「打燈嗰個好辛苦,我要遷就家輝,所以不斷敷面膜。」談到古仔最近成為演唱會熱門嘉賓,早前出席完鄭秀文尾場嘉賓,田蕊妮和謝安琪都開晒口希望請到他,吳鎮宇即笑說:「我音樂劇都爭人喎,古天樂你嚟客串一、兩場啦!」

分享: