【夢想成真】飛起張致恒 關智斌9月「單飛」踏紅館

16年前以boy’z名義出道,現已改名為BOYZ的組合成員關智斌和張致恒,原定在今年9月舉行入行以來首個紅館騷,可是由於張致恒被爆結婚前一腳踏5船,令形象插水,令英皇一度宣佈要擱置演唱會。受拍擋拖累的關智斌,日前拍片哭訴紅館夢是自己多年夢想,結果埋門一腳卻化為烏有,令網友替他大呼不值。事後有網友就提議由關智斌「單飛」演出,據知此提議獲英皇不少藝人支持。

而事件在昨日黃昏出現新轉機,BOYZ經理人霍汶希宣佈關智斌仍然會在9月踏上紅館,屆時容祖兒、古巨基、張敬軒、Twins亦會仗義相助。而關智斌晚上亦在IG貼上一張單人撥水相,相信就是在布吉拍攝的相片,他說:「求其放一張相先,因為經過我公司同事每一位同事手足的努力。我,關智斌,舉行首個紅館演唱會!沒有試過激動到腦袋發熱,想不到任何字去形容我的心情,我⋯唔知講咩好。」

而他事後亦發短訊多謝眾人支持:「大家好,我係關智斌,我真係好開心好開心,多謝大家嘅支持。特別係各位傳媒朋友,同埋公司一班兄弟姊妹。所有網民呢個禮拜不停同我集氣,多謝有send message畀我嘅藝人朋友同所有fans,因為係你哋不停支持,先促成到紅館演唱會。之前冇諗到件事夢想成真而家成咗事特別感恩。而家最重要係呢段時要將所有注意力都擺喺演唱會入面,先唔會辜負對我嘅支持,我會百分之二百去呈現一個good show,話畀大家知我值得呢個舞台。」

分享: