黃澤鋒52歲太太陀女 出妊娠濕疹癢到瞓唔著

「綠葉王」黃澤鋒的52歲太太陳麗麗目前已懷孕4個月,刷新了娛樂圈高齡產婦的紀錄,備受關注。二人近日接受媒體訪問,透露陳麗麗高齡懷胎面對的難題,她剛懷有囡囡時患上妊娠濕疹,全身出紅疹,痕癢難耐,令她辛苦到不能安枕。

談到懷胎後身體的變化,陳麗麗表示:「唔係重咗好多,幾KG,陀B易飽,食少咗嘢,有咗之後可能荷爾蒙分泌影響,出咗妊娠濕疹,全身都有,但又唔可以服用類固醇,令我辛苦到瞓唔到覺,好彩呢個幾月開始慢慢減退,痕係冇得忍,有時叫老公同我掃吓背,我諗得遠,我同自己講而家發晒喺我身,囡囡生出嚟冇事,我盡量食嘢小心啲。」

「而家發晒喺我身,囡囡生出嚟就冇事」

年過半百第一次做爸爸,黃澤鋒笑言:「第一個BB,真係仔女都冇所謂,前世情人,我估佢係嚟治我,反正佢唔嚟治我,我老婆都會嚟治我。」

囡囡的出現變成了他們的退休計劃,黃澤鋒兩公婆以後的生活會以小朋友行先,「我諗好囡囡出世就要買教育基金同保險,萬一我有乜嘢冬瓜豆腐,佢都完成大學,教育係好緊要,唔使佢考第一,但書一定要讀,社會競爭好大,讀過書會令你諗嘢思維好正確,冇讀過就諗嘢到一個位會停頓咗,基礎打得好,樣樣嘢都着數。」

高齡懷胎的陳麗麗患上妊娠濕疹,全身出紅疹,痕癢難耐。(網上圖片)
分享: