患糖尿兩年 吳孟達節食靜坐修心養性

66歲的吳孟達(達哥)有傳近年受糖尿病困擾,半退休的他近日接受媒體訪問時承認,「我有糖尿病,年幾兩年了,依家主要靠西藥控制住。控制得幾好,去到呢個年紀,三高應該有嘅都將會有,唔應該有的都有,自己小心啲囉!」大病令吳孟達學懂修心養性,「依家都係咁啦生活,求其平平靜靜,乜嘢都食過,樣樣都荒唐過,依家乖乖地。知善而後得定,知道唔啱,知道那條路不對,就願意定性,定而後能靜,靜而後能看,希望食碗安樂茶飯,冇嘢要求。」

達哥不想因為疾病連累家人受苦,「唔係話只有自己辛苦,身邊人都辛苦。好話唔好聽都應該是時候定性。」

不想連累身邊人受苦

吳孟達2014年因病毒感染導致心臟衰竭,被送入ICU搶救。大病過後戒煙戒酒,曾放縱飲食的他現在食得清淡,「食嘢七成飽,澱粉盡量少食,幾乎夜晚都唔食飯。」原本今年九月他要做心臟起駁器,但幸而在手術前他專研日式瑜珈,早晚花幾十分鐘進行,他說數月來心臟跳動指數回復正常,手術擱置。「日式瑜珈,要搵張硬硬地嘅床,唔要軟,身體壓住對腳,兩隻腳板反後,每次幾十分鐘,已經好攰好痛架,早上同夜晚都會靜坐。」他說。

堅持日式瑜珈 心跳回復正常

眼見身邊朋友受過這種病折磨,他經常提醒自己要節制,「眼見好多行家都真係放縱,明知自己呢樣唔得個樣唔得,都仲要好勝,如飲酒或夜晚應酬,唔去控制,最後就是糖尿引起拚發症好恐怖,切咗隻腳,跟住對眼又盲,最後走咗。」

否認客串《美人魚2》 「辛苦嘅唔敢拍」

有傳吳孟達客串周星馳明年上映的《美人魚2》,但達哥話:「好多謝好多謝大家仲記得我,多謝佢,但我是沒有參予過,你都知啦!依家辛苦嘅又唔敢拍,又要舒服,又要劇本好,又要銀紙多,全世界邊有咁多呢啲老細。咁咪食少啲囉,真係有得做咪做舒服啲,拍下廣告仔或出活動。有半碗安樂茶飯就夠,我要求唔高,已經過咗去,有飯食就算。」

吳孟達比之前清減了不少。(網上圖片)
吳孟達27歲演出劇集《楚留香》中「胡鐵花」一角開始受矚目。(網上圖片)
吳孟達與周星馳是許多影迷心目中的最佳拍檔。(網上圖片)

分享: