【87年港姐季軍】林穎嫺嫁到洛杉磯 做「溜冰媽咪」照顧3囝囡

圖︰林穎嫺現時居於美國洛杉磯,專心相夫教子。(fb圖片)

87年港姐季軍林穎嫺,曾獲國際小姐「最上鏡小姐」,又曾擔任多部電視劇嘅一線女主角;短短兩年間,佢密密接拍唔少劇集,如︰《老子萬歲》、《小小大丈夫》、《家山有福》等,又參演大型劇集《當代男兒》及《大都會》等。不過林穎嫺就到事業高峰時,突然急流勇退,到洛杉磯讀書嫁人;現育有3個可愛囝囡﹐仲做埋「溜冰媽咪」,專心培育子女成才!

囝囡愛溜冰 林穎嫺管接送

林穎嫺最近接受媒體專訪,談到囝囡近況,佢話︰「我有三個囝囡,分別14歲、12歲、10歲,佢哋都非常熱愛溜冰,所以我就做咗『溜冰媽咪』,帶住佢哋周圍練習、比賽。」移民美國20幾年嘅林穎嫺,99年嫁美籍丈夫Tom Dupont,2004年先誕下大囝Teddy,再於06年及08年,誕下大囡Michelle及小囡Julie;而林穎嫺亦放下香港娛樂圈,專心留在洛杉磯相夫教子,做幸福少奶奶。

為照顧3個寶貝囝囡,林穎嫺每日都要輪流接送,放學後又帶佢哋去練習溜冰,「(囝囡)返到屋企要即刻做功課,有時未做完,會一邊食飯一邊做功課。」如今,大囡Michelle已經12歲,長得亭亭玉立,仲好上鏡㗎,最近佢仲同朋友仔一齊做model呀!不過Michelle都好乖,話要以學業為重。

林穎嫺就話,自己好多時都會同子女講道理、大家有商有量;囝囡愛溜冰,林穎嫺都有要求,要佢哋「科科攞A」先才可以繼續,唔係就要去補習班。其實溜冰都係一幾昂貴嘅興趣,林穎嫺話,每月單係用於溜冰場嘅費用,就接近5,000美元!佢仲計過,如果囝囡都唔溜冰,慳出來嘅錢,可以買到3間度假屋呀!

不過林穎嫺覺得,只要囝囡過得開心就值得,「最重要係有自己嘅嗜好。」

分享: