【TVB 50+1】排位看端倪! 一張相揭示邊個藝員「上位」

圖︰TVB昨日(15日)舉行51週年亮燈儀式,由小生、花旦嘅排位,足見佢哋嘅「上位」端倪。(網上截圖)

TVB昨日(15日)舉行51週年亮燈儀式,成個台嘅藝員大曬冷,當然唔少得睇排位、看「上位」端倪啦!「鎮台之寶」汪明荃當然陣守前排正中間位置;而右邊起為視帝王浩信、視后田蕊妮、馬德鐘、楊明;而做《#後生仔傾吓偈》做到出晒位嘅麥明詩同馮盈盈,都孖住排第一行旁邊!

至於左邊起,就係蕭正楠、朱晨麗、黃智賢、張振朗同湯洛雯,去年台慶頒獎禮奪得「最佳女配角」嘅朱晨麗,今年亦可以「升呢」企第一行呀!即刻睇吓佢同楊明嘅「上位」感言先!

朱晨麗

對於被安排企較中間位置,去年又獲頒「最佳女配角」,朱晨麗話:「好榮幸!多謝公司畀機會我,《兄弟》呢個劇好值得大家留意,我哋拍咗大半年,過程非常辛苦,大家都打得好『甘』,多得伍允龍好肯花時間,教我用槍。」

朱晨麗係2011年港姐冠軍,比賽前被封為「翻版陳法拉」成為大熱,並同時獲最受歡迎大獎、歡樂大使獎、時尚目光大獎。2012年,佢接拍重頭劇《名媛望族》,擔任第三女主角;同年接拍重頭劇《衝上雲霄II》及劇集《情逆三世緣》。朱晨麗曾入圍《萬千星輝頒獎典禮2015》「飛躍進步女藝員」;至2018年憑《超時空男臣》奪得《萬千星輝頒獎典禮2017》「最佳女配角」。

至於今次「上位」,爭女主角獎項有望?朱晨麗就話︰「隨緣,我比較重視收視,希望有更多觀眾欣賞到這劇,獎項就交畀神。」

圖︰朱晨麗於2018年憑《超時空男臣》一劇奪得《萬千星輝頒獎典禮2017》「最佳女配角」。(影片截圖)

楊明

而在台慶劇《兄弟》做第二男主角嘅楊明,今年「上位」進佔第一排!楊明坦言,好唔容易先企到呢個位置。「我今年收到信,叫我攞20年金牌,封信邀請我食一餐晚飯,呢個金牌我等咗好耐,呢幾年好多謝公司俾機會我,我好開心可以逐步進步,希望嚟緊10年或者20年可以更加叻啲啦!」

楊明續指,「今日我覺得好鼓勵,自己紅褲仔出身,訓練班出嚟,由『獎品先生』做起,由企位最高嗰層,逐層降落,而家終於可以試下企第一排!」佢笑言,「希望下年可以再企前少少,做埋亮燈就好喇,哈哈。」

另外,節目嘅第一部分係為劇集《是咁的,法官閣下》宣傳,除咗擺出法庭布景,又有汪阿姐演法官,劇中演員逐一介紹角色,而主題曲則由胡鴻鈞主唱。

圖︰楊明曾4度獲提名「飛躍進步男藝員」,到今年終於奪獎!(影片截圖)
分享: