【嫁到這世界邊端女星】張鳳妮回港賀壽 大馬豪門闊太生活曝光!

圖︰張鳳妮(左一)都係「嫁到這世界邊端女星」。(fb圖片)

87年港姐「最受佳麗歡迎獎」得主張鳯妮,都係一位「嫁到這世界邊端女星」。自從佢1998年嫁咗畀馬來西亞富商傅仰之後,就開始喺吉隆坡定居,過住少奶奶生活,並退出香港娛樂團。最近,張鳯妮特地來港為TVB前金牌監製潘嘉德(德哥)賀壽,唔少人仲讚50歲嘅佢keep得好,完全唔似真實年齡呀!

當年張鳯妮由電視劇《灰網》起,參演20多部劇集演出,包括︰《愛情三角錯》、《餐餐有宋家》等;在《天地男兒》中,更飾演重要角色,又在《900重案追兇》演第二女主角。要從閒角逐線升到一線女主角,都真係唔容易!不過,張鳯妮就決定為結婚、為家庭放棄事業,仲離開土生土長嘅香港,到吉隆坡定居。

獲贈1,200萬港元豪宅 做薯條連鎖店老闆娘

張鳯妮婚後與傅仰峰育有3囡,老公更送贈價值1,200萬港元豪宅畀佢;又畀佢成為大馬一間薯條連鎖店嘅老闆娘!張鳯妮話︰「搞薯條店主要係因為個女鍾意食薯條,我唔清楚投資金額幾多,因為財政方面,都係老公打理,我淨係負責宣傳推廣同巡察業務。」

其實張鳯妮曾代表香港往泰國參選全國際小姐,更獲得「最上鏡小姐」為港增光;到簽約TVB後,佢又聽話、又肯做,是非又少,相信要成功保持一姐地位都唔難;但佢事業心唔重,於97年邂逅大馬富商傅仰峰之後,即視拍拖為「第一事業」,仲成功嫁個有錢人!

如今張鳯妮有車、有樓、有錢,又有薯條連鎖店,最難得係佢結婚15年,老公都對她如珠如寶;而佢自己都話,「我冇諗過再拍戲,只係想繼續照顧好3個女就夠喇!」

圖︰TVB前金牌監製德哥70歲大壽,張鳳妮(前排左二)與一班花旦小生都有現身到賀。(fb圖片)
分享: