【全民造星】姜濤大熱奪冠贏100萬! 肥仔「三甲不入」唔求婚?

圖︰《全民造星》姜濤大熱奪冠,Ian獲亞軍(左一),而Lokman(右一)就得季軍。(fb圖片)

ViuTV《全民造星》決賽昨晚(14日)舉行,結果由19歲嘅姜濤大熱奪冠,兼贏走100萬獎金!而Ian(陳卓賢)就獲亞軍,Lokman得季軍。不過表現得非常出色嘅肥仔(梁業)就「三甲不入」,雖然肥仔賽後受訪時話冇失望,但佢嘅求婚計劃就要遲多幾年先可以實行喇。

獎金會點用? 姜濤︰第一件事就係食好嘢

姜濤領獎時話:「我冇諗過要講啲乜,我要多謝嘅人太多,阿爸阿媽家姐,多謝所有支持我嘅人。」搞到台下「姜糖」(Fans)尖叫呀!年紀輕輕就得到100萬獎金嘅姜濤話,冇諗過點用獎金,「但第一件事就係諗到食好嘢,同貢獻俾父母,同埋請幫過我嘅台前幕後工作人員食飯。」至於大熱當選,係意料之內?佢就話︰「絕對唔係!如果係嘅,我都諗到講啲咩啦。其實十強大家都有傾過,一切都係未知之數。」

而對於姜濤而言,更開心嘅係得到一份廣告合約,「呢個仲驚訝過我攞冠軍,因為我幾乎已經唔記得自己casting過。」

獲周慧敏讚賞 肥仔︰都係做番專業嘢

至於表現好好卻失落冠軍嘅肥仔,佢就話冇乜失望:「表演完成咗,如果有錯誤先會令自己失望,知有好多人鍾意我,但未必係第一位,賽果係預計到。」之前肥仔曾經話過贏到冠軍兼100萬,就會同女朋友阿芬結婚,不過依家願望落空,「可能儲多幾年喇。」

而肥仔嘅出色演出獲周慧敏大讚,話肥仔一出場就相當「吸引眼球」,對節目好有貢獻,因為佢有好多創作,亦令大家好有團隊精神;肥仔回應時就話:「我係一個專業表演者,都係做番專業嘢。」

其實《全民造星》原本只得一個獎,季軍Lokman話:「我哋係有向花姐(監製黃慧君)要求過,可唔可以多兩個獎,開心啲?所以我哋好後期先至知道(有亞軍、季軍)。」而亞軍Ian就話:「(我哋)好開心喺99個參賽者中,贏到第二同第三名,雖然只係得個獎座冇獎金,但係都覺得好開心。」

圖︰表現好好嘅肥仔「三甲不入」,但就獲周慧敏大讚!(fb圖片)
分享: