【唔係分手!】江美儀與吳君祥離婚兩年 前老爺夏春秋誤爆料?

圖︰江美儀被前老爺冬叔(左二)唔小心爆料,指吳君祥(左一)同江美儀並非分手,而係離婚!(微博、ig圖片)

江美儀最近驚爆兩年前已同吳君如胞弟吳君祥分手,而且二人曾經秘婚!事件由吳君祥爸爸夏春秋(冬叔)踢爆,指二人唔係分手咁簡單,而係離婚!原來江美儀同吳君祥早於2006年喺外地註冊,分手變離婚,江美儀都要在《東張西望》解吓話!

有情緒病 無法應付分手後即公布

於昨晚(8日)播出的《東張西望》訪問中,江美儀先向大家道歉,「首先我要向各位講不好意思,真係對唔住,我冇諗到原來你哋咁緊張我,我一直諗,我只係一位小演員,冇諗到大家咁緊張我嘅私生活。講返最初係因為我們都覺得,呢件事係作為藝人,唯一可以控制嘅事,所以我們兩個決定唔講,而且我個人好隨心,我冇好多計劃。」

江美儀又話︰「其實大家都知道我有情緒病,如果我分手後即刻同大家講,又要面對記者,我肯定無辦法處理。而家過咗兩年,家人都接受,我自己都可以平靜同大家講呢件事,所以覺得自己準備好要講喇;咁好啦,有記者問我,我就話已經分手喇。」至於秘婚,江美儀話,結婚呢年事當初冇講過,到而家分手都唔想講,「請大家高抬貴手,希望自己可以重投新生活。」

至於冬叔唔小心「泄密」,江美儀話,「佢當然覺得失策、覺得好煩,點解有咁多人搵佢?其實還好,我哋冇怪佢;我要澄清,我冇叫佢講咩,或者唔好講咩,純粹係佢自己,講咗咪講咗囉。」

圖︰江美儀同吳君祥一直互稱男女朋友,原來佢哋早於2006年在外到註冊結婚,再於兩年前離婚。(微博圖片)
分享: