【抑鬱症4年】顏仟汶憶述患病經歷 「唔好驚人哋標籤自己!」

圖︰顏仟汶最近接受媒體專訪,憶述自己患情緒病嘅經歷。(微博圖片)

「唔好驚人哋標籤自己!你畀人知,唔係話要人同情你;起碼我突然喺度喊,你會知道我咩事!」顏仟汶最近接受媒體專訪,憶述自己4年來患抑鬱症的經歷。家住10樓的顏仟汶,曾試過在露台時,望到自己「瞓咗喺下面」;又會行街會好驚,唔鍾意有人行近,不然就會閃開……

顏仟汶4年前曾面對愛犬相繼離世;一個中午,佢瞓醒後突然坐喺屋企露台係咁喊,喊足6、7個鐘,喊到好攰。佢之後打畀一位朋友傾訴,友人懷疑佢有情緒病,勸佢盡快睇醫生,結果被診斷為抑鬱症。

曾冇覆診兩次 要入院接受治療

顏仟汶選擇去公立醫院求醫,醫生問診時,當講到父母時,顏仟汶喊到跪咗喺地下!醫生開藥後,轉介佢去精神科,每隔幾個月就要定時覆診。

治療期間,顏仟汶試過要去廣州開工而偷懶冇覆診兩次,點知搞到要送院接受治療。「停咗個多、兩個月藥,我排期排唔番,到最尾,我先生陪我去求醫生畀期,政府醫院臨時真係冇籌,我去到又失控係咁喊唔停,病情返番去起點之餘,仲差咗!」醫生見狀,即刻call白車送佢入院治療,畀番藥佢食,先控制返病情。因此顏仟汶呼籲,「抑鬱症患者千祈唔好自己停藥!」

受工作感情事打擊 情緒低落會暱埋喊發洩

顏仟汶今年5月正式同丈夫簽字離婚,加上事業停滯、又面對離婚打擊,「呢年幾兩年,工作上、感情上,我好down。」面對情緒低落,顏仟汶會暱埋喺屋企喊發洩,「我係喊包,好悽涼、好陰功咁喊,喊到頭爆炸,眼腫又瞓唔到,喊完會好啲。」有時激動,佢會開車出去兜吓;又或者突然好想走出去大嗌、去淋雨,佢認為︰「唔開心盡量有啲嘢畀自己做,一個人喺屋企乜都唔做係最大件事嘅。」

除咗喊舒緩,顏仟汶亦踩roller抒發情緒,「踩roller令我諗起好多細個讀書嘅嘢,健康運動,我久唔久會嚟攞住對鞋游吓游吓出一身汗。」

圖︰顏仟汶今年7月於網上分享一篇有關離婚的帖文,並指自己選擇放手及祝福對方。(微博截圖)
圖︰顏仟汶自言,爸爸是令她堅強的理由。(微博圖片)
圖︰顏仟汶亦愛去旅行,今年8月就去咗越南。(微博圖片)
分享: