【要着校服?】Boy’z演唱會玩Dress Code Fans︰肥到着唔落喇!

圖︰Boy’z將於10月16日(星期二)舉行《The Unboxing Live》演唱會,昨日(3日)Kenny話想睇觀眾着校服出席!(ig圖片)

「做我喜愛事幹怎麼會慢/怎麼會難/可給我豁出去隨便玩/都有權不玩/才是歎……」《LALA世界》係Boy’z於2003年推出首張專輯時嘅作品;Boy’z出道16年,今年終於有機會合體開第一次售票演唱會!

昨日(3日),關智斌(Kenny)同張致恒(Steven)喺ig宣布演唱會加場無望,「之前一直沒有確實回覆,是因為公司盡了最大的努力,可是仍因為場地的問題,所以⋯只此一場,沒有加場。」同時公布演唱會Dress Code︰校服!不過Dress Code一出,即刻引起網民激烈留言,似乎歌迷都覺得着校服係有困難嘅!

Kenny︰我哋陪你着!

Kenny於ig留言話,「最後dress code的要求!我地想睇你地著(着)!!! #校服 #校服裙 #水手裝都唔介意」,仲話︰「#唔使怕尷尬喎 #我哋陪你著(着) #回到校園時 #比自己瘋狂一晚咁多 #大男孩 #大女孩 let’s go!」而網民隨即留言話,「肥到著(着)唔落喇」、「我十幾年前支持你就話有校服姐,我而家仔到生埋,點會有校服」、「我要係邊摷番出黎(嚟)」。

亦有觀眾話︰「我真係無勇氣着出街」、「咁我咪要着件校服去返工?要好大勇氣呀!會俾同事笑死」。有Fans更加趁機同Kenny話,「大住肚著(着)校服會唔會好怪異?我老公當年就係因為追我,而我又勁愛你,所以佢改英文名做Kenny ga(㗎)!」而有Fans就在Steven ig憶述,「仲記得個陣著(着)住校服出function 跟住比報紙影到,第二日即刻比訓導捉左去訓話勁耐。」

Boy’z話「我哋陪你着」,即係已經預告咗演唱會嘅服裝,係校服呀!

分享: