【曾拍瓊瑤劇】《延禧》「順嬪」張嘉倪曾激嬲方中信 原因係……

圖︰張嘉倪於《延禧攻略》中飾演順嬪,而佢就曾經擔任瓊瑤劇《又見一簾幽夢》的女主角,更在拍劇時激親方中信呀!(網上截圖)

由張嘉倪飾演嘅《延禧攻略》「順嬪」雖然戲份唔多,但就被網民形容為「最美奸妃」;佢喺《延禧》嘅演出後段因為教唆明玉自殺兼陷害瓔珞,令觀眾恨之入骨。原來張嘉倪亦曾經因為拍瓊瑤劇《又見一簾幽夢》,激嬲劇中男主角方中信,更令對方3、4日唔同佢講嘢,冷戰冷到氣氛勁僵!

方中信講完4頁紙台詞 張嘉倪竟忘詞NG!

瓊瑤曾經撰文話,「方中信一怕熱、二怕大段台詞、三怕『重拍』。」而當年因贏出湖南衛視瓊瑤劇選角活動,而成為《又見一簾幽夢》女主角嘅張嘉倪,就犯咗上述3件事之中嘅其中兩件,令方中信大爆發!方中信曾經表示,「演出這部戲(《又見一簾幽夢》)對我來說挑戰很大,因為我需要花很多時間矯正發音和修改台詞,還要帶新人張嘉倪入戲,這讓我壓力很大。」

方中信續指,「不過讓我最生氣的是,跟張嘉倪拍戲時,我好不容易把四頁紙的台詞一字不少地說完,但台詞只有10個字的她竟然毫無反應。當時聽到導演說要重拍,我差點就氣瘋,而她不道歉,還一直坐著擺出一副什麼都不知道的樣子。」事後方中信嬲完,問張嘉倪點解唔道歉,得到嘅答案係︰唔鍾意講「對不起」。方中信辛辛苦苦背好4頁紙對而白,張嘉倪一句唔記得台詞就要NG,仲唔道歉?都真係好難唔嬲嘅。

瓊瑤剖析二人冷戰

瓊瑤事後亦曾撰文「爆料」剖析二人冷戰一事,仲話張嘉倪︰「我們的『新人』,總算『磨』出來了,以後就漸入佳境了。」如果冇方中信嬲爆張嘉倪,張嘉倪劇中嘅喊戲,都未必咁好睇呀!因為當方中信同張嘉倪冷戰期間,張嘉倪拍出咗劇中喊得最靚、最入戲、最動人嘅一個鏡頭。

其實張嘉倪嘅呢場喊戲,因為被排到好前,佢都未進入狀態就要開拍。瓊瑤話,當日方中信有事要返香港,連機票都買埋;但因為張嘉倪一再NG,又喊唔出、「接戲」又接唔好,臉色越拍越蒼白,最後仲拍到虛脫倒地!好彩張嘉倪休息完之後愈拍愈進步,方中信嬲完,大家就繼續如常拍劇喇!

分享: