【明年香港開騷】張學友推購票新方法? 同樣不設售票處賣票!

圖︰張學友宣佈於2019年1月11至29日舉行共15場「學友·經典-香港站·再見篇」,為其世界巡迴演唱會畫上句號。(網上截圖)

自從劉德華演唱會未開賣先發生排隊斬人事件,大家亦開始試用新的購票方式,希望防止同類事件發生之餘,亦同時打擊「黃牛黨」。今日(3日)宣佈將於2019年11至29日期間,於紅館舉行15場演唱會的張學友,亦將選用新方法售票,同樣不設售票處賣票,並首次試行「延後取票」方案。

指定信用卡優先訂票將於聽日(4日)至8日推出;而10月12日(下星期五)起,門票將於城市售票網公開發售,想撲飛就要以下資訊喇!

售票首天 每張信用卡最多可購4張飛

由於不設售票處賣票,想買飛就先要準備一張信用卡。而在售票首日,每張信用卡最多只可購買4張門票。而且,亦會試行「延後取票」,即購票一經確認後,購票人士需攜帶相關信用卡於每場演唱會嘅演出日期前14日至演出當日,到城巿售票網售票處或自助取票機取票。

原來學友兩年前因紅館檔期問題,未能喺香港舉行「學友·經典」世界巡迴演唱會首站;所以希望安排演唱會於香港結束。學友話︰「(演唱會)本來喺今年暑假結束,但係因為冇期而延到11月,再因為冇期,延到明年嘅1月,所以我都要多謝紅館,因為中間令我哋做多超過50場,令我嘅回憶可以延長一啲,做多啲。」不過亦因為檔期限制,演唱會將不再加場,「場數少咗,門票係緊張咗,但係攞出去買嘅飛比上次多咗,但幾多我就唔清楚。」

學友又話,「香港站我唔敢講係好完美嘅結束,但一定係圓滿結束。」

【公開售票購票方法】

方法一︰網上購票,登入 www.urbtix.hk;
方法二︰致電 2111 5999,以信用卡電話購票;
方法三︰使用流動購票應用程式 My URBTIX 購票。
*公開售票首日,每一張信用卡只限購買不多於4張門票。

分享: