【係甜嘅!】陳豪忙拍劇少見面 陳茵媺︰we miss you and your muscles

圖︰陳豪忙工作,陳茵媺忙「放閃」。(ig圖片)

陳豪同陳茵媺呢對恩愛夫妻,2013年結婚後「三年抱三」,現育有兩子一女。最近,陳豪忙於拍攝TVB新劇《殺手》,與家人相處時間自然少咗好多。不過,陳豪依然好努力抽時間見妻兒,而陳茵媺就不時在ig分享與老公同仔女嘅合照「放閃」!

昨日(2日),陳茵媺分享一張陳豪抱住一仔一女嘅合照,留言同老公隔空傳情話︰「 I love you baby…. @moses_chan_ and we miss you! Oh, AND your muscles! (我愛你… 我們很掛念你!呀,還有你的肌肉!)」嗯,係甜嘅!

Kay︰睇相甜到「忽然糖尿」

而早於上星期,陳茵媺仲分享一張佢同陳豪嘅合照,話老公忙於拍新劇,好彩抽到幾個鐘同佢拍吓拖。相片中,陳茵媺放將戴住巨鑽戒指嘅手放喺陳豪嘅胸膛,二人望鏡頭甜美。大家紛紛讚「so sweet」之際,連幸福人妻謝安琪(Kay)都睇唔過眼;話睇甜到佢「忽然糖尿」呀!

其實陳豪為咗一家五口忙到冇時停,但都好識得平衡家庭同工作。好似今年暑假,陳茵媺帶住3個仔女返加拿大;到佢哋飛返香港當日,陳豪不但親自去接機,仲要逐個鍚鍚,的確係個好老公、好爸爸!

圖︰連幸福人妻謝安琪(Kay)都忍唔住話二人甜到佢忽然有「糖尿病」。(ig截圖)
圖︰陳茵媺分享呢張相,相信都係「老公視覺」喇!(ig圖片)
圖︰陳豪同陳茵媺自2013年結婚後「三年抱三」,至今依然咁恩愛。(ig圖片)
分享: