【電競專訪】香港電競隊點發展? YTK︰有如足球隊組班

圖︰(大圖左起)YTK外務總監、藝人羅鈞滿,以及YTK館長魏子遒,接受《流動新聞》專訪。(Elaine攝)

要發展電競這門新興運動與產業,人才培養及贊助愈見重要!電競成為亞運項目,加上在內地、東南亞,以至海外的發展漸見成熟;香港電競亦漸漸起步,發展潛力不容小覷。電競隊YTK今年代表香港到北京參加《王者榮耀冠軍杯國際邀請賽》;《流動新聞》專訪館長魏子遒,以及外務總監、藝人羅鈞滿,了解在香港發展電競隊的現況。

羅鈞滿︰足球需要贊助 電競隊亦然

羅鈞滿指︰「講到電競,好多人嘅concept仲係『打機』,始終以前『打機』係人同電腦去打,而家社會、互聯網、通訊咁發達,其實人同人嘅接觸係好近嘅!尤其玩呢個遊戲係『5對5』嘅團隊遊戲,變咗你係真人、5個人打5個人;要考智慧、團隊合作、策略、操控,係一個咁樣嘅競技。」他續指,「呢個遊戲真係要對人腦,而唔係對電腦;透露人的即時反應,人與人的即時溝通,一齊去攻、去守。」

而籌辦電競隊,就像足球隊組班,要有固定隊員、訓練和其他配套,羅鈞滿指︰「足球會有人sponsor,好似以前精工、寶路華、快譯通,都贊助球隊。(電競隊)有場地(贊助)最好,而有cash都好重要;因為唔可以每一次比賽都用唔同嘅人,而係要5至7人團隊好夾,冇呢個班底去做,(勝出比賽)係好難嘅事。」

圖︰電競講求團隊合作,要鬥智、鬥力!(fb圖片)

館長︰一開始完全冇支援

創辦電競隊YTK的館長魏子遒表示,「一開始嘅時候完全係冇(支援)嘅,因為呢隻game全部在國內嘅,我覺得佢要增加玩家數目,一定要向海外行。我由『0』開始已經想籌備呢件事,都搞咗兩年㗎;我自己就搞咗一個類似嘅(電競)比賽,在銅鑼灣舉行,嗰時所有嘅獎金、獎品,都係我自己一個搵sponsor,得我自己一個去搞。」

魏子遒指,那次比賽反應非常好,「我覺得玩家數目,香港都唔係冇,只係差一個發展嘅機會!」根據官方數字,香港的《王者榮耀》玩家有6至7萬人,「不過呢6至7萬人之中,有啲可能係得閒玩吓;但亦有一啲係日日玩,每日玩7、8個鐘!而出嚟打比賽嘅,就係有protential嘅玩家。」現時,YTK主要靠排名發掘和挑選新隊員;由於現時還未夠資金支持全職隊員,YTK隊員更辭職到北京參賽。

圖︰YTK亦有派員參加本月初公民力量舉辦的《王者榮耀手遊電競賽》,並贏得冠軍。(Elaine攝)

唔止電競隊員 還有周邊項目!

如果電競事業發展成熟,可謂商機處處!羅鈞滿舉例,「只係講韓國,已經有電競隊啦!又有大企業,如samsung等支持;講遠少少,美國已經有啲電競比賽,單係報名費都過千元美金;因為佢個獎金池講緊係1億美金!呢一種事對香港人而言,可謂天方夜譚!講返國內嘅呢個比賽,一隊戰隊嘅市值,可高達1億元人民幣;一名隊員嘅轉會,可涉及過逾千萬人民幣。」

魏子遒又表示,香港人對於電競,還是要加強教育,「因為講緊仲有好多周邊嘅項目,如︰直播、籌辦比賽搞event等,例如︰內地一個直播主嘅Fans,可多過一個artist、月入可過百萬;簽約費,可能一千萬!畢竟只有好少人可以做到職業比賽嘅(電競)戰隊隊員,但好多人可以做到周邊嘅工作(附屬產業)!」【電競在香港】系列之三

圖︰除了培訓參與職業比賽的戰隊隊員,電競亦包括許多附屬產業。(fb圖片)
分享: