【真‧幸福摩天輪】陳奕迅下月辦免費演出 「今次我係喺核心內圍開騷」

圖︰Eason指,今次開免費騷係為咗回饋香港。(網上截圖)

陳奕迅(Eason)早前預告會同the duo band在香港開免費騷,昨晚(26日)Eason到商台參與《1872陳奕迅》節目,終於可以公布免費騷詳情。Eason話,呢個慈善音樂會將於下月27號,於有「核心內圍」之稱嘅中環摩天輪舉行,門票不設公開發售,只預留小量門票畀聽眾入場!

「我應承咗要回饋番香港」

Eason話,今次開免費騷係嘅原因係︰「我應承咗要回饋番香港,所以呢個騷係唔會賣飛!」不過要開慈善騷,程序同技術上都有好多好煩嘅嘢,「本來真係諗過捐錢就算,點知突然間場地嗰邊又話得喎,真係皇天不負有心人,到時會邀請慈善機構嘅受惠者,一齊喺摩天輪下面睇騷。」佢又笑言:「今次我係喺核心內圍開騷,不過內圍同外圍呢啲嘢,要問吓明福俠先得,多謝佢啲月餅,好正!從來未試過收到明福俠嘅月餅。」

佢又透露,獲邀欣賞演出嘅對象全部都係年青人,「其實個場地只係容納千幾人,香港可能有啲人係冇時間,又或者冇能力睇騷,所以想俾佢哋一啲正面嘅選擇!呢件事係好過癮,我哋今次啲歌又好正面,所以邀請係好過賣飛!」如今搞騷有好多問題,加上係免費騷,Eason都要諗辦法確認觀眾身分,「到時入場係要對名,電台觀眾可能有小量門票;曾經有諗過不如set一啲門票係賣出去,之後將錢捐番出去,但係最後決定全部唔賣飛,唔想講錢!」

至於電台觀眾點攞飛?Eason就話︰「唔係打電話上嚟就有飛攞,要睇吓佢係咪有愛嘅人!」既然演出咁正能量,唔知Eason喺摩天輪開騷,又會唔會唱番首《幸福摩天輪》應吓景呢?

圖︰Eason and the duo band 將一同參與呢場慈善音樂會。(YouTube截圖)
分享: