【開心速遞】明日之星變閒角 梁証嘉自爆冇戲開原因係……

圖︰梁証嘉近年淡出TVB幕前,上星期終於加入《愛‧回家之開心速遞》。(網上截圖)

無綫處境喜劇《愛‧回家之開心速遞》又有新角色出場!上星期(19日)一集,朱凌凌(吳偉豪 飾)的二哥朱天梯(梁証嘉 飾)突然致電告知,老竇朱展(陳嘉輝 飾)因知道朱凌凌放棄讀法律系,而心肌梗窒,當中一幕,梁証嘉怒轟吳偉豪︰「爹哋就係俾你激親,搞到心肌梗窒,而家要通波仔呀!」十分搶戲。其實梁証嘉早於2006年入讀第20期無綫電視藝員訓練班入行,演過《天與地》,卻由明日之星逐漸變閒角……

唔願Keep Fit 「以為機會係自動會有」

梁証嘉曾被視為「明日之星」,有份參演唔少重頭劇如︰《巾幗梟雄》、《天與地》等,其中,梁証嘉在《天與地》中飾演殺死「家明」的少年版鄭振軒(Ronnie),令人留下深刻印象。至於後來點解會被變閒角?梁証嘉接受媒體訪問時坦言︰「以前我以為機會係自動會有,拍完一套劇時,等下就會有第二套可以做,而我喺中間嘅時間從來冇好好裝備自己,當正放假咁,好放肆咁食嘢,搞到個人好肥,個人脹咗。」

梁証嘉指︰「當時珍姐、樂小姐好錫我,好心搵我傾偈勸我減肥、Keep Fit,因為變肥咗上鏡唔好睇,但係我冇理到,以為呢個問題唔嚴重。」他又指,自己待人處事有好多不足,唔太識講嘢,「到公司唔再畀(機會拍劇),我確實係有啲灰。」年幾兩年前,佢更加在TVB絕跡,因此當佢突然於《愛‧回家之開心速遞》「復出」,唔少觀眾都覺得出奇。

嘗試到內地發展 但首選都係TVB?

最近一年,梁証嘉主力在內地發展,雖然國內拍嘢比起TVB賺得多,但佢自言唔係因為片酬多先去國內做嘢。「係因為表演空間、機會都多啲,多啲機會、多啲磨練永遠係開心過多啲片酬,演技唔會因為多啲錢而改進。」佢又話,TVB始終都係自己嘅首選,「我喺國內拍咗幾多嘢,香港嘅觀眾都未必知你怕咗咩,我喺香港出世香港大,係我自己地方,香港永遠都係首選。」

至於可以加入《愛‧回家之開心速遞》,梁証嘉指,還未知道後續發展:「首先我要多謝監製林建祥畀機會我加入劇組,我覺得細佬(吳偉豪)同嘉洛都好好;雖然我都算係師兄,但佢哋兩個一路都有帶住我做戲,幫搵Sit-com個節奏,等我知道點樣可以再做好啲,因為我一路以嚟都冇拍過Sit-com。」

經歷事業谷底,梁証嘉再次重新出發,更指︰「團火就慢慢喺工作當中撻返着,我而家敢講我係好愛我自己嘅工作。」

圖︰梁証嘉「爆Seed」鬧爆吳偉豪一幕,真係好搶戲。(網上截圖)
圖︰梁証嘉感謝周嘉洛、吳偉豪帶佢入戲。(網上截圖)
圖︰梁証嘉曾在《巾幗梟雄》一劇飾演敖嘉年、吳卓羲嘅細佬。(網上圖片)
分享: