【又傳婚變】楊冪中秋只貼單人照 劉愷威被傳暗撻富家女

圖︰劉愷威同楊冪婚變傳得正熱,男方更被傳暗撻富家女Britney,兩人合照已於網上流傳。(微博圖片)

楊冪與劉愷威結婚4年,並育有囡囡小糯米。不過,二人婚後屢傳婚變,近日劉愷威更被傳「暗撻」富家女Britney,劉愷威與Britney嘅合照近日更於網上流傳,搞到劉愷威要透過工作室回應。

工作室發聲明指,「照片是在拍戲時,片方領導帶這位女士來現場,愷威禮貌配合而已,二人無任何交集。」似乎想劉愷威與Britney「劃清界線」;而劉愷威嘅爸爸劉丹,日前被問及唔出席活動,係咪想避開囝囝緋聞?劉丹更嬲住回應︰「多餘,真係多鬼餘,我唔講啦!」

楊冪中秋貼獨照

今日(24日)係中秋節正日,楊冪就於個人微博貼出一張獨照,留言︰「中秋快樂鴨(呀)!啦啦嚕嚕啾咪!」楊冪於相中展露微笑,但點解中秋呢個一家人團圓嘅大節日,楊冪都係只貼單人相?真係唔知係低調,定係真係不和。而網上又流傳另一截圖,見到有網民留言,大爆「楊冪和劉愷威已經離婚兩年」!

據知,劉愷威與楊冪婚後因工作而聚少離多,多次傳出感情轉淡;不過因為愛女小糯米,佢哋曾經多次「高調合體」。除咗劉愷威與Britney今次嘅緋聞,早於16年初,楊冪曾被傳戀上「小鮮肉」李易峰,李易峰更在同年尾爆出於酒店夜會內地女星王鷗,劉愷威與楊冪當時都雙雙否認傳聞。

而今年9月12日係楊冪32歲生日,但劉愷威沒有在微博公開發文祝賀,亦成為二人婚變的其中一個「證據」。

圖︰網上流傳楊冪與劉愷威已離婚2年的留言,留言者正是Britney。(微博截圖)
分享: