【突然爆料…】龔嘉欣︰覺唔覺佢婚後唔同咗? 黃德斌︰聽聞你都快啦!

圖︰龔嘉欣自言冇人追,但就有朋友穿針引線中……(ig圖片)

黃德斌同龔嘉欣今日(21日)齊齊出席活動,啱啱做人夫嘅黃德斌表現風騷;旁邊嘅龔嘉欣就笑住問記者︰「覺唔覺佢婚後唔同咗?以前沉默寡言,依家活潑開朗又幽默。」黃德斌就回應:「都唔係今日(幽默)㗎啦,你少見我啫。」唔知係咪講得太興奮,黃德斌竟然話龔嘉欣︰「聽聞你都快(結婚)啦!」

龔嘉欣︰唔係呀,一陣又誤傳!

最近轉新Look拍劇嘅龔嘉欣,本身仲笑緊黃德斌係長輩,「嗰時《愛回家》你都做我阿哥啦,我睇住你大,睇住你成家立室。」點知黃德斌唔知講真定講笑咁話︰「聽聞你都快(結婚)啦,唔使怕醜喎。」龔嘉欣即刻澄清話︰「唔係呀,一陣又誤傳,我唔急㗎!」

點知黃德斌仲繼續講︰「呀邊個,佢話唔急喎,你聽唔聽到呀?」而龔嘉欣就解釋,自己最近冇人追,而且太忙,日日都開緊劇!早排打大風搞到屋企水浸,好彩有鄰居幫忙,咁唔通對象就係鄰居?龔嘉欣就笑住話:「都係夫婦、婆婆,可能要等佢地啲孫啦!」但係佢又透露,好多朋友努力撮合緊…… 大家就等吓好消息啦!

分享: