【相差48年…】70歲姜大衛細仔得22歲 有咩名人同囝囡年齡差距大?

圖︰70歲姜大衛同22歲細仔姜卓文,年齡相距48年。(網上截圖)

姜大衛同李琳琳早於1974年結婚,之後仲生咗兩個囡,至1996年竟「老來得子」,生咗現年22歲嘅細仔姜卓文,計落卓文同大家姐年齡差距21年,同爸爸姜大衛更係相差48年!當兩位家姐都已經有自己家庭,卓文就仲喺香港SCAD(薩凡納藝術設計大學)讀緊設計咋!

其實娛樂圈仲有唔少名人同姜大衛一樣,同囝囡年齡相差都好大。以下呢啲名人,同囝囡年紀仲相差50歲或以上。

杜德偉

56歲杜德偉(Alex),於54歲那年榮升爸爸,即係話,囝囝同佢嘅年齡足足相差54年呀!自囝囝Alex Junior出世後,大家都覺得Alex愈來愈型,今年父親節,兩仔爺仲身穿父子裝「放閃」。Alex仲曾經在訪問透露,自己想為囝囝添弟妹,當時佢仲話:「今晚就努力!生仔、生女都冇所謂。」即係話,Alex準備再生同佢年齡差距更大嘅囝囡呀!

郭富城

郭富城同囡囡寶貝女Chantelle年紀都相差51歲,而郭富城好享受做爸爸。最近,佢接受媒體訪問時就話︰「喺我呢個年紀,我覺得能夠做到爸爸,係上天嘅恩賜。我好感恩,因為我記得50歲嘅時候,同自己講喺某個年齡到嘅時間裡面,係上天安排咗俾你,仲有自己自身方面,你都拼咗咁多年,我覺得都係時候要穩定,喺自己嘅生活上要改變。」最近,有媒體指方媛又有咗,雖然二人都未有回應,但其實郭富城都想追個仔㗎!

任達華

任達華同名模琦琦於1997結婚,到2004年,囡囡任晴佳(Ella)先出世,任達華同囡囡年紀都相差50年㗎!Ella係備受關注嘅「千禧星二代」,因為佢遺傳咗媽咪嘅model基因,樣子清秀甜美,大長腿仲好吸睛!雖然琦琦話Ella對鏡頭比較怕醜,唔太鍾意上鏡,但之前佢幫雜誌拍時裝照,真係好上鏡、好有潛質做model㗎!

劉德華

早幾個月先參加完囡囡劉向蕙(Hanna)幼稚園畢業禮嘅劉德華,同Hanna嘅年齡差距亦有50歲!因此,劉德華特別珍惜同囡囡嘅相處,唔想錯過Hanna成長中每個重要時刻。出席Hanna畢業禮嘅劉德華,見到囡囡行上台攞畢業證書時,仲興奮到企起身望住愛囡笑,做咗囡囡嘅小Fans呀!當時,更有在場人士指朱麗倩陀緊B呀!

圖︰杜德偉同囝囝年齡足足相差54年!(ig圖片)
圖︰郭富城同囡囡相差51年,佢更為妻女安定落嚟。(網上圖片)
圖︰任達華同囡囡任晴佳(Ella)年齡相距50年。(網上截圖)
圖︰劉德華與太太朱麗倩現身囡囡畢業禮,更有在場家長「目測」朱麗倩正在懷孕。(網上圖片)
分享: